Ishsiz xotin-qizlar ish bilan taʼminlandi

Jamiyatimizda ayolga ehtirom ularga nisbatan koʻrsatiladigan eʼtibor va albatta yaratilayotgan imkoniyatlardan koʻngillar shod boʻladi beixtiyor. Darhaqiqat, har bir ayol nafaqat ona, sevimli yor, balki, u jamiyatimizning har bir sohasida oʻzining faolligi bilan mamlakat rivojiga hissa qoʻshib kelayotgan fidoiydir. Bugungi kundagi xotin-qizlar tadbirkorligini keng yoʻlga qoʻyish, ular bandligini taʼminlashga eʼtibor qaratish davlat siyosati darajasiga koʻtarilgan. Binobarin, tadbirkor, oʻz kasbining mahoratli egasi boʻlgan xotin-qizlar nafaqat oʻz oilasiga balki atrofidagilarga ham nafi tegadi.

Kuni kecha partiyaning tuman Kengashi tashabbusi bilan Pastdargʻom tumanida joylashgan “Beka Charos” masʼuliyati cheklangan jamiyatida “Qishloq sharoitida oilaviy tadbirkorlikni rivojlantirish, ayollar uchun yangi ish oʻrinlarini yaratishning va oilalar moddiy taʼminotining ishonchli manbai” mavzusida boʻlib oʻtgan davra suhbatida ham yuqoridagi masalalar tilga olindi. Davra suhbati davomida davlatimiz tomonidan xotin-qizlarga yaratib berilayotgan imkoniyatlar va ulardan qay darajada foydalana olyapmiz, bu imkoniyatlar har bir xotin-qiz uchun muhim ekanligi haqida gapirib oʻtildi. Shuningdek xalq deputatlari viloyat Kengashi deputati Gulbeka Qoʻchqarovaga bandlik masalasida murojaat qilgan besh nafar xotin-qizlar shu kunning oʻzidayoq “Beka Charos” korxonasiga ishga qabul qilindi.

Bandligini taʼminlab, oʻz oilasiga qoʻshimcha yordam berish maqsadida deputatimizga murojaat qilgan ayollarimiz orasida nogironligi boʻlgan xotin-qizlarning ham mavjudligi, bugungi kunda ularga keng imkoniyatlar eshiklari ochiq ekanligining yaqqol dalilidir.

Bu uchrashuvdan koʻzlangan asosiy maqsadlardan biri albatta bu xotin-qizlarimizning ishsizligiga yechim topish, ularni tadbirkorlik faoliyatiga yoʻnaltirib, oilasi va xalq farovonligiga hissa qoʻshishga qaratilgan boʻlsa, biz maqsadimizga ozmi-koʻpmi erisha oldik deb ayta olamiz.

Xonbuvi Xayitova,

“Adolat”SDP Pastdargʻom tuman Kengashi raisi.