Murojaatnomada koʻzda tutilgan masalalarni yanada chuqurroq oʻrganish va ijrosini taʼminlash yuzasidan seminar boʻlib oʻtdi

Bugun Oʻzbekiston “Adolat” SDP Siyosiy Kengashi Markaziy apparati tomonidan Oʻzbekiston Respublikasi Texnik jihatdan tartibga solish agentligi tadbirlar zalida “Oʻzbekiston Respublikasi Prezidenti Shavkat Mirziyoyevning Oliy Majlis va Oʻzbekiston xalqiga Murojaatnomasida koʻzda tutilgan masalalarni yanada chuqurroq oʻrganish va ijrosini taʼminlash ” mavzusida seminar boʻlib oʻtdi.

Tadbirda Oliy Majlis Qonunchilik palatasi deputatlari, “Adolat” SDP Siyosiy Kengashi Markaziy apparati va Oʻzbekiston Respublikasi Texnik jihatdan tartibga solish agentligi, shuningdek, Oʻzbekiston Respublikasi Sanitariya-epidemiologik osoyishtalik va salomatlik xizmati xodimlari, tashabbuskor yoshlar, partiya faollari, keng jamoatchilik hamda OAV vakillari ishtirok etishdi.

Tadbirda soʻzga chiqqanlar Murojaatnomada respublikamizning siyosiy, iqtisodiy, ijtimoiy va madaniy sohalariga birdek aloqador dolzarb masalalar ilgari surilganligi, unda belgilab berilgan ustuvor maqsad va vazifalar — harakatlar dasturulamali boʻlishini alohida taʼkidlab oʻtdilar.

Shuningdek, jarayonda Murojaatnomada tibbiyot sohasiga alohida urgʻu berilgani, joriy “Insonga eʼtibor va sifatli taʼlim yili”da tibbiy xizmat sifatni yangi bosqichga koʻtarish borasida qilinishi zarur boʻlgan ishlar haqida atroflicha suhbatlashildi. Qolaversa, sud-huquq, davlat boshqaruvi hamda taʼlim sohasida amalga oshirilayotgan islohotlar, shuningdek, ayni davrda ilgari surilayotgan tashabbuslar haqida batafsil maʼlumot berilib, ularni amalga oshirishda nafaqat davlat tashkilotlari balki keng jamoatchilikning ham faol ishtiroki zarurligi aytib oʻtildi.

Oʻzaro ochiq muloqot va qizgʻin ruhida oʻtgan tadbir davomida ishtirokchilar oʻzlarini qiziqtirgan birqancha savollarga deputatlar hamda partiya faollaridan batafsil javob olish imkoniga ega boʻldilar.

O’zbekiston “Adolat” SDP
Matbuot xizmat