Narkologik kasallar ichki ishlar organlari tashabbusi bilan ham davolashga yuborilishi mumkin

Keyingi yillarda mamlakatimizda narkologik kasalliklarning oldini olish, tashxis qo'yish va davolash, ularga chalingan shaxslarni tibbiy-ijtimoiy reabilitatsiya qilishni rivojlantirish bo'yicha keng qamrovli ishlar amalga oshirilmoqda.

Xususan, narkologik yordam to'g'risidagi qonunchilikka muvofiq, narkologik kasallikka chalingan shaxsni majburiy davolashga yuborish to'g'risidagi materiallar narkologiya muassasalarining, bunday kasallikka chalingan shaxs oila a'zolarining yoki qarindoshlarining iltimosnomalari asosida ichki ishlar organlari tomonidan tayyorlanadi va rasmiylashtiriladi.

Ammo shunga qaramay, narkologik kasallikka chalingan shaxslarni tibbiy-ijtimoiy reabilitatsiya qilishni narkologik yordam to'g'risidagi qonunchilikka muvofiq davlat tomonidan kafolatlangan narkologik yordam turi sifatida belgilash zarurati yuzaga kelmoqda.

Oliy Majlis Qonunchilik palatasidagi “Adolat” SDP fraksiyasining yig'ilishida ko'rib chiqilgan “Narkologik kasalliklar profilaktikasi va ularni davolash to'g'risida”gi O'zbekiston Respublikasining Qonuniga o'zgartishlar kiritish haqida”gi qonun loyihasida bu borada qator yangiliklar o'z aksini topayotgani e'tiborga molikdir.

Fraksiya a'zolari qonun loyihasini ko'rib chiqish jarayonida uning bugungi kundagi ahamiyati va zaruratini e'tiborga olishdi. Ushbu hujjat aholiga narkologik yordam ko'rsatish sifati va samaradorligini oshirishga xizmat qilishini alohida e'tirof etishdi.

Qizg'in muhokamalar chog'ida deputatlar tomonidan partiya pozitsiyasidan kelib chiqqan holda takliflar bildirildi. Savol-javoblardan so'ng, qonun loyihasi ma'qullandi.

Yig'ilishda fraksiya faoliyatiga doir boshqa masalalar ham ko'rib chiqildi.