Poytaxtliklar safdoshlarimiz tashabbusidan minnatdor

Maʼlumki, “Adolat” SDP Toshkent shahar kengashi tomonidan poytaxtimizning barcha tumanlarida ijtimoiy koʻmakka muhtoj insonlar uchun xayriya tadbiri tashkil etilgan edi. Mazkur xayriya tadbirini tashkil etishdan koʻzlangan asosiy maqsad qishning ayozli kunlarida kam taʼminlangan aholiga yordam berishni nazarda tutadi. Bu kabi ezgu ishlar oʻzining ijobiy samarasini berayotgani quvonarli hol.

Jumladan, mazkur xayriya tadbirlarida Toshkent shahar partiya tashkilotining barcha tuman kengashlari faollari hamda mahalliy kengash deputatlari ishtirok etdi. Xususan, Uchtepa tuman kengashi raisi X.Xonkeldiyev va tuman deputatlari “Farhod”, “Bogʻchinor”, “Sharq yulduzi” MFYlarida boʻlib, yordamga muhtoj xonadonlarga issiq yopinchiqlar tarqatdilar. 

Shuningdek, partiyaning Shayxontohur tuman kengashi raisi hamda shu tumandagi “Koʻkcha” okrugidan saylangan deputat D.Islomova oʻz tumanidagi ijtimoiy himoyaga muhtoj aholi xonadonlariga tashrif buyurib, partiya tomonidan issiq koʻrpa-toʻshaklar taqdim etdi. Bu kabi tadbirlar poytaxtimizning Mirzo Ulugʻbek, Olmazor, Mirobod, Yakkasaroy tumanlaridagi oʻnlab mahallalarda hamda Yoshlik talabalar shaharchasida ham tashkil etildi.

Bu eʼtibordan mamnun aholi xayriya tadbiri tashkilotchilari faoliyatiga omad tilab, oʻz minnatdorliklarini bildirishdi.

“Adolat” SDP Toshkent shahar kengashi
Matbuot xizmati