Salomatligimizga eʼtiborni kuchaytirishimiz kerak

Hayotda eng ogʻir vaziyatlar, albatta, bu salomatlik bilan uzviy bogʻliq boʻladi. Xususan, eng kuchli insonlargina bunday dardlarni yengib oʻtishadi. Sir emaski, bugungi kunda onkologik kasalliklar yil sayin koʻpayib bormoqda. Har bir kasallikning asl sababi, albatta,  insoniyatning oʻz tabiati, yashash tarzi va muhitidan kelib chiqishi ham mumkin. Mana shunday murakkab kasalliklarni davolash markazi hisoblanmish Samarqand ixtisoslashtirilgan onkologiya va radiologiya ilmiy-amaliy tibbiyot markazining yigʻilishlar zalida Oliy Majlis qonunchilik palatasining, deputatlari Muzaffara Abdiyeva, Kompolshik Yelena Aleksandrovna, shuningdek, xalq deputatlari Samarqand viloyat va shahar kengashi deputatlari va markaz xodimlari ishtirokida Prezidentimiz Shavkat Mirziyoyev tomonidan mamlakat taraqqiyotining joriy va istiqboldagi ustuvor yoʻnalishlari bayon qilingan Oliy Majlisga Murojaatnomasiga bagʻishlangan katta yigʻilish tashkil etildi.

Uchrashuv davomida Samarqand ixtisoslashtirilgan onkologiya va radiologiya ilmiy-amaliy tibbiyot markazining barcha qulayliklari hamda bemorlarga yaratilgan sharoitlar oʻrganildi. Tadbir davomida mutaxassislar tomonidan koʻplab takliflar bildirildi. Joiz topilgan va ushbu soha rivoji uchun muhim hisoblangan barcha takliflar Oliy Majlis qonunchilik palatasi deputatlari tomonidan yozib olindi.

Samarqand ixtisoslashtirilgan onkologiya va radiologiya ilmiy-amaliy tibbiyot markazi shifokori Melikov Asliddin tomonidan berilgan taklifda ham shifokorlarning oliy toifali kategoriya olishlari uchun, oʻz hududlarida yoki Samarqand shahrining oʻzidan olish imkonini yaratuvchi tizimni ishlab chiqish taklif qilindi. Shuningdek, tibbiyot sohasini rivojlantirish va ayni yoʻnalishda aholiga xizmat koʻrsatish sifatini yanada oshirishga xizmat qiluvchi qator takliflar ham aytib oʻtildi. Bu oʻz oʻrnida soha xodimlari zimmasidagi masʼuliyatni yanada oshirishi taʼkidlandi. Chunki har bir shifokor, har bir bemor hayoti uchun masʼuldir.

Bunday muhim takliflar soha vakillari tomonidan bir necha yillardan buyon ushbu yoʻnalish rivojiga toʻsqinlik qilib kelayotgan masalalarga yechim boʻlishi, shubhasiz.

Tadbir jarayonida, sogʻliqni saqlash sohasi rivojiga xizmat qiluvchi kelgusi rejalar haqida oʻzaro suhbatlashildi. Jumladan,  Davlatimiz rahbarining Oliy Majlisga va Oʻzbekiston xalqiga yoʻllagan Murojaatnomasida yakunlangan 2022-yildagi yutuqlar qayd etilib, amaldagi yilni “Insonga eʼtibor va sifatli taʼlim” yili, deya nomlashi barchani quvontirish bilan bir qatorda, inson qadriga boʻlgan eʼtibor yanada ortishini koʻrsatadi. Joriy yildan boshlab barcha sohalar jumladan, sogʻliqni saqlash sohasida ham salmoqli oʻzgarishlar kutilmoqda. Shu bois, bugungi tadbirning tashkil etilishi bejiz emas, undagi koʻzlangan asosiy maqsad fuqarolarimizni kutilayotgan ijobiy oʻzgarishlardan boxabar qilish va ularning yurt istiqboliga daxldorlik hissini orttirishni nazarda tutadi, toki har bir soha vakili davlatimizning bugungi inson qadri va manfaatlariga xizmat qiluvchi siyosatini, uning mazmun-mohiyatini tushunib yetsin.

Gulnafisa Abdimurodova,

“Adolat” SDP Samarqand viloyat kengashi matbuot kotibi.