Saylovning birinchi bosqichi boshlandi

Joriy yilning 23-yanvar kuni Oʻzbekiston “Adolat” SDP Qoraqalpogʻiston Respublikasi Kengashi Ijroiya Qoʻmitasi yigʻilishida tasdiqlangan tashkiliy qoʻmitaning birinchi yigʻilishi boʻlib oʻtdi. Unda Oʻzbekiston “Adolat” SDPdan Oʻzbekiston Respublikasi Oliy Majlisi Qonunchilik palatasi huzuridagi Yoshlar parlamentiga saylovni oʻtkazishni va tashkil etish masalasi koʻrib chiqildi.

Yigʻilishda Oʻzbekiston “Adolat” SDP Qoraqalpogʻiston Respublikasi Kengashi Ijroiya Qoʻmitasi raisi N.Qaipbergenov “Oʻzbekiston “Adolat” SDPdan Oʻzbekiston Respublikasi Oliy Majlisi Qonunchilik palatasi huzuridagi Yoshlar parlamentiga aʼzolarni saylash tartibi toʻgʻrisida”gi Oʻzbekiston “Adolat” SDP Siyosiy Kengashi Ijroiya Qoʻmitasining 2023 yil 20 yanvar kungi 38-son majlisi 1-son qarorining 1-ilovasi bilan tasdiqlangan Nizomiga batafsil toʻxtaldi.

Taʼkidlanganidek, Nizomga asosan yoshlar parlamentiga saylov 2019-yilda Oliy Majlis Qonunchilik palatasiga deputatimiz saylangan 3-sonli Ellikqalʼa saylov okrugi hududida oʻtkaziladi. Ushbu okrug hududiga Ellikqalʼa tumani va Beruniy tumanining bir qismi kiradi.

Yigʻilishda masofaviy “Zoom” dasturi orqali partiyamizning Ellikqalʼa va Beruniy tumani Kengashi raislari ishtirok etib, ularga saylovni toʻgʻri tashkil etish boʻyicha zaruriy topshiriqlar berildi.

Oʻzbekiston “Adolat” SDP Qoraqalpogʻiston Respublikasi
kengashi Matbuot xizmati