Sifatli taʼlimni ta'minlash uchun oʻqituvchilarni hurmat qilaylik!

Davlatimiz rahbari Oliy majlisga va xalqimizga yoʻllagan Murojaatnomasida ham yoki oʻtkazayotgan yigʻilishlari davomida ham taʼlim sifatini oshirish, oʻqituvchilarning maqomini koʻtarish borasida koʻplab vazifalarni belgilamoqdaki, bugungi kunda ommaviy axborot vositalaridagina emas toʻrt kishining boshi qoʻshilgan kichik davralarda ham oʻqituvchining obroʻsi, taʼlim-tarbiya sohasidagi beqiyos oʻrni maʼnaviy hayotimizdagi taʼrifiga til lol qoladigan buyuk voqealar sababchisi ekanligi tilga olinmoqda.

Ammo, eti sizniki, suyagi bizniki, degan gaplar bugun jamiyatimizda andak unutilib borayotgandek, goʻyo. Sababi, oʻqituvchilar va ularga nisbatan tazyiqlar bilan bogʻliq ayrim salbiy voqealar bugungi kunning eng “trend”ga chiqqan mavzularidan biri boʻlib qoldi. 

Yoshligimizdan barchamizga singdirilib kelingan Ustoz otangdek ulugʻ degan jumlalar ham oʻsha oʻtmishda qolayotgandek. Mana shunday koʻnglimizni xira tortishga majbur qilayotgan holatlarni koʻrib, inson beixtiyor hozirgi zamonamiz yoshlaridan xafa boʻlib ketishi tabiiy. Aslida olganda fikrimcha barcha muammo hozirgi zamon yoshlarida emas balki, ularning oiladagi olayotgan tarbiyasida yoki ota-onalarning oʻz farzandlari koʻrsatayotgan hunarlariga koʻz yumib boshqalardan ayb qidirishlarida deb oʻylayman.

Taʼlim tarbiyani faqat maktabga ishonib, oʻzlari farzandi uchun faqat qorinini toʻqlovchi, ustini butlovchilik vazifasini oʻtayotgandek, goʻyo. Esimda, qizim endi birinchi sinfga borganda ustozi chiroyli yoza olmagani uchun past baho qoʻygandi, yonidagi oʻquvchi bilan shoʻxlik qilib darsga xalaqit bergani uchun dars davomida tik turgʻizib jazo bergandi. Shunda men ham ayolligimga borib, onalik hislarim tufayli ustoziga nisbatan “nega bunday qiladi, mumkin emas bu”, — deb norozilik bildirganimda, turmush oʻrtogʻim “Jim boʻling! Farzandingiz oldida uning ustozini zinhor hurmatsiz qilmang”, — deya tanbeh bergandilar. 

Bugun-chi oʻqituvchi sal balandroq ovozda gapirsa ota-onalarning dagʻdagʻasiga uchraydi, tartibga chaqirib, haddidan oshgan taqdirda qoʻl koʻtarsa ishi sudgacha yetadi.

Axir Yangi Oʻzbekistoning porloq kelajagini yaratguvchisi shu muallim emasmi? Yoshlarning teran maʼnaviyatli, yuksak intellektual salohiyatli boʻlib yetishishi koʻp jihatdan shu oʻqituvchilarga bogʻliq emasmi? Bir soʻz bilan aytganda oʻz taraqqiyotining yangi davriga qadam qoʻyib, Yangi Oʻzbekiston barpo etilayotgan tarixiy davrda zahmatkash ustozlarning oʻrni beqiyos. Ana shu yoshlarga taʼlim-tarbiya berayotgan ustozlarni hurmatini saqlash, obroʻsini oshirish biz ota-onalarning zimmamizdadir. Zero, qush uyasida koʻrganini qiladi degan naql bejizga aytilmagan. Farzandimiz bizdan koʻrganlarini erta borib ustozlariga qiladi.

Tozagul Xoliqova,
Xalq deputatlari Samarqand viloyat Kengashi deputati.