Taʼlimga eʼtibor — mamlakatning kelgusidagi ravnaqini taʼminlaydi

Oʻzbekiston “Adolat” SDP Koson tuman Kengashi tomonidan partiyaning “Taʼlim sifati – partiya eʼtiborida” loyihasi doirasida tuman xalq taʼlimi boʻlimi tadbirgohida “Taʼlim olishda yoshlarga yaratilgan imkoniyatlar: yutuqlar va muammolar” mavzusida davra suhbati boʻlib oʻtdi. Unda oʻqituvchilar, partiya faollari, ota-onalar qatnashdi.

Tadbirda xalq deputatlari Qashqadaryo viloyat Kengashi deputati, tuman maktabgacha taʼlim tashkiloti rahbari Mavjuda Jumayeva maʼruza qildi.

-Bugungi hayotni zamonaviy ilm-maʼrifat va taʼlimning taraqqiyotisiz tasavvur etib boʻlmaydi,-dedi Mavluda Jumayeva.- Dunyoning yetakchi davlatlarida taʼlimni rivojlantirish eng asosiy va birinchi galdagi vazifa sifatida belgilanishi ham bejiz emas. Masalan, dunyoda eng rivojlangan davlat sifatida tan olingan Yaponiyada ham eng avvalo taʼlim taraqqiyotiga juda katta eʼtibor qaratilgan. Davlatning asosiy mablagʻlari shu sohaga yoʻnaltirilgan. Shu tufayli ham maʼlum bir vaqt oʻtgandan soʻng Yaponiya mislsiz oʻzgarishlarga erishdi.

-Darhaqiqat, har qanday mamlakatning kelgusi ravnaqi aynan shu sohada qoʻlga kiritgan yutuqlari bilan chambarchas bogʻliqdir,- dedi xalq deputatlari tuman Kengashi deputati Qahramon Sultonov.- Shu tufayli ham davlatimiz rahbari tomonidan taʼlim sifatini yanada takomillashtirishga alohida eʼtibor berilyapti. Bu borada partiyamiz tomonidan amalga oshirilayotgan ishlar ham tahsinga sazovor. Prezidentimiz rahnamoligida universitetlarning taʼlim berish faoliyati yanada takomillashtirilayapti. Bunda xalqimizning asrlar davomida shakllanib kelgan ilm sari intilish fazilati yana bir bor namoyon boʻlayotir. Kelajagimiz egalari maʼnan sogʻlom hamda goʻzal turmush kechirish, insoniy qadr-qimmatini kamsitishga yoʻl qoʻymaslik, barkamollikka erishish uchun harakat qilyapti. Yangi Oʻzbekiston yoshlari bu jarayonda taʼlim olishni eng asosiy shart sifatida koʻrmoqda.

Shuningdek tadbirda soʻzga chiqqan partiya faollari Lobar Abidova, Hamza Oʻrinov, taʼlim sohasi fidoiysi Bahorgul Namozova va boshqalar taraqqiyotni jadallashtirish, raqobatbardosh kadrlar tayyorlash, ilmiy va innovatsion faoliyatni samarali tashkil etish haqida oʻz fikr mulohazalarini bildirdilar.

Tadbir yakunida tobora kuchayib borayotgan talablarga javob berish maqsadida harakat qilish zarurligi uqtirildi. Har qanday sharoitda ham taʼlim sifati va samaradorligini oshirish, mamlakatimiz istiqbolini taʼminlaydigan yetuk oʻgʻil –qizlarni tarbiyalab voyaga yetkazish zarurligi yuzasidan foydali taklif va tavsiyalar bildirildi.

Xushnoza Baratova,

Partiya faoli.