Vatan fidoiy farzandlarini hech qachon unutmaydi

Davlatimiz rahbari Surxondaryo viloyatiga tashrifi chogʻida Termiz shahridagi “Yosh chegarachilar” harbiy-akademik litseyini borib koʻrdi. Davlatimiz rahbari shu yerda Vatan himoyasi va el-yurt tinchligi yoʻlida halok boʻlgan harbiy xizmatchilar va xodimlarning oila aʼzolari bilan uchrashdi. Videoaloqa orqali tadbirga Qoraqalpogʻiston Respublikasi va viloyatlar vakillari ham bogʻlandi.

Aytish joiz, oʻsib kelayotgan yoshlarni, yaʼni Vatanimizning boʻlgʻusi himoyachilarini vatanparvarlik ruhida tarbiyalash — davr talabi. Vatanparvarlik insonning oʻz oilasiga, avlod-ajdodlarining or-nomusiga chuqur ehtiromi, vijdoniga, burchiga va oʻz soʻziga sodiqligidir. Agar inson bolalik chogʻidan oʻz xalqiga, uning anʼanalariga, tili va madaniyatiga muhabbat hamda hurmat ruhida tarbiya topsa, unda vatanparvarlik hissi baland boʻladi. Vatan hissi insonga Vatanidan olisda boʻlganida ham yaqqol seziladi.

Uchrashuvda davlatimiz rahbari Vatanimiz tinchligini saqlash yoʻlida halok boʻlgan harbiylarimizni nomlarini nomma-nom yodga oldi. Bunday dovyurak farzandlarni dunyoga keltirib, haqiqiy vatanparvar qilib tarbiyalagan ota-onalarga, ularning umr yoʻldoshlari va farzandlariga xalqimiz nomidan chuqur minnatdorchilik bildirdi.– El-yurt uchun jonini fido qilgan oʻgʻlonlarimizni “halok boʻlgan” deyishga til bormaydi. Ular oilasi uchun, Vatanimiz uchun hamisha barhayot, – dedi Shavkat Mirziyoyev.

Vatanimiz sarhadlarini saqlash yoʻlida aziz jonini fido qilgan oʻgʻlonlar xotirasini abadiylashtirish, ularning oila aʼzolariga har tomonlama gʻamxoʻrlik koʻrsatish va qoʻllab-quvvatlash bundan buyon ham davom ettirilishini aytib oʻtdi.

Shu maqsadda 13-mart kuni “Vatan himoyasi va el-yurtimiz tinchligi yoʻlida halok boʻlgan harbiy xizmatchilar va xodimlar oila aʼzolarini ijtimoiy qoʻllab-quvvatlashni kuchaytirish chora-tadbirlari toʻgʻrisida”gi Prezident farmoni ham qabul qilindi. Mazkur farmonning qabul qilinishi nafaqat harbiylar, ularning oilasi va yaqinlari uchun, balki barchamiz uchun quvonarli voqea boʻldi, desam yanglishmayman.

Farmonga koʻra, har bir oila aʼzosi uchun pensiya miqdori 25 foizga oshirilishi va shunga asosan har bir oila aʼzosi oʻrtacha 2 million soʻmdan pensiya olishi belgilandi.Shuningdek, harbiy xizmatchining oila aʼzolari bepul davolanish, navbatdan tashqari statsionar tibbiy yordam olish, xizmatchining ota-onalari, turmush oʻrtogʻi har yili bepul davolanishi, bolalari oromgohlarda sogʻlomlashtirilishi,, ota-onasi yiliga ikki marta temir yoʻl va havo transportida bepul yurishi va shu kabi bir qator qulayliklar hamda imtiyozlar belgilandi.

– Harbiy-jangovar va yuksak maʼnaviy salohiyat Oʻzbekiston Qurolli Kuchlarining ikki buyuk tayanchiga aylanishi zarur, – dedi Prezident.

Shuningdek, Davlatimiz rahbari Vatan ozodligi yoʻlida fidoyilik koʻrsatgan oʻgʻlonlarimiz jasorati ham yosh avlod uchun ibrat ekani, ular haqida asarlar yaratish kerakligini taʼkidladi.

Bir narsani eʼtirof etishimiz zarur, vatanimiz yoʻlida fido boʻlgan oʻgʻlonlarimizning oilalari va yaqinlari uchun bu kabi mukammal imtiyozlar, oʻzgarishlar yaqin orada boʻlmagan edi. Bu oʻzgarishlar tub mohiyati bilan aytganda Vatan ravnaqi, yosh avlodimizda qatʼiy hayotiy pozitsiya va vatanimiz taqdiri uchun yuksak masʼuliyat tuygʻusini shakllantirishida alohida ahamiyatga ega. Ayniqsa, yurt otasining harbiylar farzandlari, ular bilan samimiy suhbati har bir insonni toʻlqinlantirib, ruhlantirib yubordi, desam aslo mubolagʻa emas. Qachonki, yosh avlod bu kabi imtiyozlar, qulay imkoniyatlar yaratilayotganligini va bu haqiqatni toʻliq anglasa, oʻzini shu Vatan kamoloti uchun masʼuliyatini his etadi, shaxsiy manfaatlarini shu yurt, shu xalq manfaatlari bilan uygʻunlashtirib yashaydi, komil inson boʻlib tarbiya topadi. Muxtasar aytganda bunday ulkan oʻzgarishlar, berilayotgan imtiyozlar, gʻamxoʻrliklar zamirida mamlakatimizda oʻrta maktabdan boshlab oliy oʻquv yurtlarigacha qamrab oladigan uzluksiz harbiy taʼlim va vatanparvarlik boʻyicha oʻziga xos noyob va yaxlit tizim yaratilayotganligi eʼtirofga loyiqdir.

Bir soʻz bilan aytganda, davlat rahbarining viloyatga bu galgi tashrifi ham viloyat ahli uchun quvonchli boʻldi.

Sardor Ochilov,

Oʻzbekiston “Adolat” SDP Surxondaryo viloyat

“Yosh adolatchilar qanoti” Kengashi raisi.