АҚШ хакерларга қарши кураш бўйича коалиция тузмоқчи

Америка Қўшма Штатлари хакерларга бошпана бераётган давлатларни жавобгарликка тортиш учун халқаро коалицияни шакллантириш устида иш олиб бормоқда, деб баёнот берди АҚШ давлат котиби Энтони Блинкен.

"Ҳукуматимиз тармоқларимизни вирус-товламачилардан ҳимоя қилиш мақсадида уларга қарши кураш стратегиясини ишлаб чиқмоқда. Бу хакерлик ҳужумида иштирок этганларни ўз ҳудудида яшираётган давлатларни жавобгарликка тортиш учун халқаро коалиция ташкил этишни тақозо этади", - деди Блинкен, конгресс аъзолари саволларига жавоб берар экан.

Шунингдек, унинг қўшимча қилишича, бундай стратегияни ҳаётга жорий қилиш учун АҚШ ушбу масалада иттифоқчи мамлакатлар билан ҳамкорликни мустаҳкамлашни ҳам назарда тутади.

Бундан аввалроқ АҚШда Colonial қувур тармоғи операторига ҳамда JBS гўшт ишлаб чиқариш компанияси тармоғига йирик киберҳужум уюштирилган эди, натижада маҳсулот етказиб бериш жараёни тўхтаб қолди. Ўшанда Оқ уй хакерлар россияликлар бўлиши мумкинлиги ҳақида баёнот берди.

Қолаверса, Президент Жо Байден россиялик ҳамкасби Владимир Путин билан кибержиноятчиликка қарши курашда умумий тартибларни аниқлаб олиш масаласини муҳокама этиши зарурлиги ҳақида ҳам маълум қилганди.

ЎзА