КОНСТИТУЦИЯВИЙ ИСЛОҲОТЛАР: Сенат ваколатлари кенгаяди

Конституциянинг 80-моддаси Олий Мажлис Сенатининг ваколатларига оид бўлиб, Конституциявий ислоҳотлар доирасида киритилаётган ўзгартиришларда мазкур тузилманинг мансабдор шахсларни лавозимига сайлаш жараёнидаги ваколатларини кенгайтириш белгиланмоқда.

Бугунги кунда Ҳисоб палатасининг раисини лавозимига тайинлаш ва озод этиш масаласи Президент фармонига асосан амалга оширилади. Киритилаётган ўзгартиришлар эса Сенат томонидан Президент тақдимномасига асосан Ҳисоб палатаси раисини сайлаш назарда тутилмоқда. Бундан ташқари Коррупция­­га қарши курашиш агентлиги раҳбарини лавозимига тайинлаш тўғрисидаги Президент фармонини тасдиқлаш масаласини ҳам Сенатнинг ваколатига ўтказиш таклиф этилмоқда.

Бу жараёнлар, албатта, Сенатнинг давлат бошқарувида ваколатларини кенгайтириш билан бир қаторда парламент халқ вакилларидан иборат эканлиги, давлат бош­қаруви органини шакллантириш жараёнида фуқароларнинг бевосита эмас, балки вакиллари орқали билвосита иштирокини кенгайтираётганидан далолат.

Хорижий тажрибани ўрганиб кўрганимизда ҳам айнан парламентнинг давлат бошқаруви раҳбарларини сайлашда, ҳукуматни шакллантиришдаги роли кенг­лигини кўришимиз мумкин. Шу сабабли ҳам бугунги кунда Сенат томонидан мансабдор шахсларни сайлаш ваколатларининг кенгайтирилаётганлиги парламентга қўшимча масъулият бериши билан бир қаторда, шу соҳа бўйича жавобгарликни ҳам оширади.

Энди Сенат нафақат раҳбарни лавозимига тайинлаши, балки унинг ҳисобдорлигини таъминлаши, шу соҳадаги камчиликларни парламент назорати тартибида кўриб чиқиб, бартараф этиш чораларини кўриб бориши, соҳани тартибга солиши, соҳада фуқароларнинг ҳуқуқ ва эркинликларининг янада кенгроқ таъминланишига эътибор қаратиши лозим бўлади. Бу эса Сенатга қўшимча ваколат ҳамда қўшимча масъулият юклайди.