— Мусобақа ёш полвонларнинг миллий спорт турига чексиз меҳр қўйганини, халқимизнинг анъаналарини юксак қадрлашини ҳам кўрсатди. Шогирдларимнинг барчаси совриндорлар қаторидан ўрин олганидан беҳад қувондим, уларнинг бу ютуқлари туфайли умумжамоа ҳисобида биринчи ўринга сазовор бўлдик.
Вилоятимизнинг ўзида 6000 мингдан ортиқ ёшлар ушбу спорт турига ошно бўлишган. Андижонда белбоғли кураш бўйича ўзига хос мактаб яратилган, деб бемалол айта оламиз. Вилоятимиз жамоаси Ўзбекистон кубоги ва мусобақаларида доим олдинги ўринларни эгаллаб келишади. 2017 йилда Туркманистоннинг Ашхобод шаҳрида ўтказилган ёпиқ иншоотлардаги Осиё ўйинларида ҳам 5 нафар шогирдимиз қатнашиб, 2 та олтин, 2 та кумуш, 1 та бронза медаллар билан тақдирланишган эди.
Авваллари белбоғли кураш асосан, тўй-ҳашам, сайилларда ташкил этилган бўлса, кейинги 10 йил давомида бу миллий спорт тури бўйича мусобақалар сон жиҳатдан ҳам, сифат жиҳатдан ҳам ошди, халқаро нуфузга эга бўлди.
Ушбу мусобақа ҳам ёш курашчиларимиз учун ўз кучларини синовдан ўтказиб олиш имкониятини ҳамда жорий йил бўлиб ўтадиган ёшлар ва ўсмирлар ўртасидаги жаҳон чемпионати мусобақаси олдидан тайёргарлик вазифасини ўтаб берди.
Муҳиддин АШУРОВ,
Андижон олимпия захиралари
ихтисослаштирилган мактаб-интернатининг
белбоғли кураш бўйича мураббийси
...
Китобхонликка берилаётган эътибор ёшларнинг маънавий дунёсини ривожлантиришда, уларнинг ҳар томонлама шаклланишида, ўз нутқини эркин ва равон ифодалай олишида хизмат қилади. Албатта, мамлакатимиз раҳбари томонидан ишлаб чиқилган беш ташаббусдан бири ҳам ёшлар маънавиятини юксалтириш, улар ўртасида китобхонликни кенг тарғиб қилиш чора-тадбирлар дастури лойиҳаси тўғрисида бўлиб, юртимизнинг ҳар бир фуқароси ана шу ташаббус йўлида астойдил бел боғлашди. Жумладан, Ўзбекистон “Адолат” СДПнинг Когон шаҳар Кенгаши ходимлари ва депутат Нодира Мўминова Когон шаҳридаги 8-умумтаълим мактаби ҳамда ўзи таълим олган Когон туманидаги 7-умумтаълим мактабларида бўлиб, ёшларнинг маънавий камолотини юксалтириш йўлида мактаб кутубхонасига бадиий, илмий-оммабоп китобларни совға қилди.
Партиянинг Когон туман Кенгаши раиси Мактуба Ҳамроева эса беш ташаббус йўлида илдам қадам ташлаб, ўзи таълим олган илм маскани - Жондор туманидаги 23-умумтаълим мактабида бўлиб, ёшлар билан суҳбат қилар экан, албатта, бугунги кунда улар учун яратилаётган шароитлар, имкониятлар билан ўртоқлашди. Китобхонликни ривожлантириш, ҳар бир инсон ўз уйида кутубхона ташкил этиши лозимлиги тўғрисида гапириб ўтди. Уларга турли мавзудаги китоблар совға қилиб, қувончига қувонч қўшди.
Партиянинг Пешкў тумани фаоллари ва депутатлари ҳам жойларда бўлиб, китобхонлик тарғиботига жуда катта эътибор қаратишмоқда. Хусусан, Афшона Тиббиёт коллежида бўлиб ўтган “Китобхонлик – инсон маънавияти кўзгуси” мавзусидаги давра суҳбатида бугунги кунда олиб борилаётган тарғибот ишлари ҳамда китобхонлик борасида қабул қилинган қарор ва фармонлар моҳияти тўғрисида фикр - мулоҳазалар билдирилди. Шунингдек, депутат Фарҳод Болтаев ҳамда партиянинг Пешкў туман Кенгаши ходимлари томонидан коллеж кутубхонасига китоблар тақдим этилди.
Абдурашид ҚЎЧҚОРОВ,
Ўзбекистон “Адолат” СДП
Бухоро вилоят Кенгаши раиси ўринбосари
...
Ўзбекистон “Адолат” СДП Сиёсий Кенгаши Ижроия қўмитасининг навбатдаги кенгайтирилган йиғилиши бўлиб ўтди. Унда партия Сиёсий Кенгаши ва Ижроия қўмитаси аъзолари, Қонунчилик палатаси депутатлари, партия ҳудудий кенгашлари раислари, Марказий аппарат масъул ходимлари иштирок этишди.
Танқидий руҳда бўлиб ўтган йиғилишда 2019 йилнинг биринчи чорагида партиянинг барча даражадаги тузилмалари ва депутатлик корпуси томонидан амалга оширилган ишлар, эришилган ютуқлар, шу билан бирга, фаолиятда йўл қўйилган камчиликлар таҳлил қилинди. Шунингдек, партия Сиёсий Кенгашининг жорий йил 7 февраль куни бўлиб ўтган пленумида белгиланган вазифалар ижроси ҳамда партия фаолиятига доир масалалар муҳокама этилди.
Мажлисда Ўзбекистон “Адолат” СДП Сиёсий Кенгаши раиси ўринбосари Фарҳод Ишанкуловнинг ахбороти тингланди.
— Жорий йилнинг биринчи чораги якунлари ҳамда партия Марказий аппарати масъул ходимларининг 14 та ҳудудий кенгашлар ва 194 та туман, шаҳарлар ташкилотларида ўтказган ўрганишларида барча кенгашлар ҳам бугунги кун талаби бўйича ишламаётгани маълум бўлди, — деди Ф.Ишанкулов. — Таҳлиллар шуни кўрсатмоқдаки, ҳудудий партия кенгашлари фаолиятида бир қатор камчиликлар мавжуд.
Масъул ходимлар томонидан туман, шаҳар кенгашларининг номенклатура йўриқномаси бўйича иш юритиш ва партиявий топшириқларни ижро этишда Фарғона вилоятининг 10 та тумани, Андижон вилоятининг 5 та, Навоий, Тошкент вилоятлари ҳамда Тошкент шаҳри, Қорақалпоғистон Республикасининг ҳар бирида 4 тадан, Хоразм вилоятининг 3 та, Наманган, Сурхондарё вилоятларида 2 тадан туман, шаҳар партия кенгашлари фаолиятида сусткашликка йўл қўйилгани қайд этилди.
Мажлисда ҳокимият вакиллик органларидаги, айниқса, халқ депутатлари туман Кенгашларида партия депутатларининг масъулияти ва фаоллигини ошириш, уларнинг партия тузилмалари билан янада яқин алоқада ишлашини таъминлаш ҳақида тўхталиб ўтилди. Хусусан, партия депутатлари ташаббуси билан жорий йилнинг 1-чорагида партия депутатлик гуруҳлари томонидан маҳаллий Кенгашлар сессияларида 72 та, доимий комиссияларда 107 та масала кўриб чиқилиб, тегишли қарорлар қабул қилинган. Бунда, айниқса, Бухоро, Навоий ва Жиззах вилоят кенгашлари фаоллик кўрсатган бўлса, халқ депутатлари Сурхондарё, Фарғона вилоятлари Кенгашларидаги партия депутатлик гуруҳлари томонидан тегишли Кенгаш сессияларига бирорта ҳам масала киритилмаган.
Шунингдек, аҳоли муаммоларини ҳал этиш ва ҳудудларни ижтимоий-иқтисодий ривожлантиришда мутасадди ташкилотларга депутатлик сўрови киритиш ваколатидан ҳам айрим депутатлар унумли фойдалана олмаяпти. Айрим ҳудудларда мутасадди ташкилотлар, мансабдор шахсларнинг депутатлик сўровига эътиборсизлик билан қараётгани ҳам салбий таъсир қилмоқда. Халқ депутатлари Тошкент шаҳар Кенгашидаги сафдошларимизнинг эса депутатлик сўрови киритишга доир ишларида бир қатор камчиликлар мавжуд.
— Президентимизнинг ижтимоий, маънавий-маърифий соҳалардаги ишларни янги тизим асосида йўлга қўйиш бўйича илгари сурган 5 та ташаббуси бўйича юртимиз бўйлаб кенг кўламли ишлар амалга оширилмоқда, — деди партия Марказий аппарати Аёллар ва ёшларнинг сиёсий фаоллигини ошириш бўлими мудири Гулруҳ Агзамова. — Ҳудудий кенгашларимиз фаолиятида мазкур ташаббуслардан бири бўлган хотин-қизлар бандлиги, ёшлар ўртасида соғлом турмуш тарзини қарор топтириш ва уларни спортга жалб этиш йўналишларида амалий тадбирларнинг миқдор ва сифат даражаси, самараси қониқарли эмас. Беш ташаббусни аҳоли, айниқса, ёшлар ўртасида тарғиб қилиш мақсадида ҳар бир ҳудуднинг ўзига хослигини назарда тутган ҳолда чора-тадбирлар режаси ишлаб чиқилмаган.
Ўзбекистон “Адолат” СДП Сиёсий Кенгашининг ХI пленуми қарори асосида партия тизимида “Бир ойда бир иш ўрни” лойиҳаси амалиётга жорий қилинди. Лойиҳа доирасида ҳар ойда ҳар бир туман (шаҳар) ташкилоти бир нафар фуқарони ишга жойлаштиришга кўмаклашиши, натижада ҳар ойда партия ташаббуси билан 200 га яқин фуқаро иш билан таъминланиши кўзда тутилган эди. Аммо мазкур лойиҳа бўйича ҳудудлардаги барча ташкилотларимиз ҳам бирдек ишлаяпти, дея олмаймиз. Бунда Хоразм, Бухоро ва Тошкент шаҳар партия кенгашлари фаоллик кўрсатаётган бўлса, қолган ҳудудларда бу масалага етарлича эътибор қаратилмаяпти.
Йиғилишда ҳудудий кенгашлар томонидан партиявий лойиҳаларни амалга ошириш ҳолати ҳам атрофлича муҳокама қилинди. Партиянинг “Адолат — қонун устуворлигида” лойиҳаси доирасида ҳар ҳафтанинг чоршанба куни маҳаллаларга ташриф буюриб, мавжуд муаммоларни, қонунлар ижросини ўрганиш ва аҳолини қийнаётган масалаларга депутатлар иштирокида ечим топиш вазифаси белгиланган эди.
Шу мақсадда партия ташкилотларининг ишчи гуруҳлари 2019 йил биринчи чораги давомида 1767 та маҳалла фуқаролар йиғинидаги 30572 та хонадон ва хўжалик юритувчи субъектларда ўрганишлар олиб боришди. Учрашувлар мобайнида аҳоли томонидан 3543 та мурожаат келиб тушиб, уларда қайд этилган масалалар юзасидан 806 та мутасадди ташкилотларга депутатлик сўровлари юборилди. Натижада 262 та муаммо ўз ижобий ечимини топди. 2500 га яқин мурожаатлар ҳуқуқий маслаҳат бериш орқали ҳал этилди.
Афсуски, бу борада Андижон, Наманган, Самарқанд, Фарғона вилоятлари ва Тошкент шаҳар ҳудудий кенгашлари фаолияти талаб даражасида эмас.
Партиянинг “Сиёсий-ҳуқуқий билимларни мустаҳкамлаш — демократик жамият пойдевори” лойиҳаси мамлакатимизда қабул қилинган қонун ҳужжатларининг мазмун-моҳиятини аҳоли орасида кенг тарғиб қилиш, уларнинг ҳуқуқий онги ва маданиятини оширишга қаратилган бўлиб, қонунларнинг мазмун-моҳиятини маҳаллаларда фуқароларга тушунтириб, айниқса, ёшларни қонунларга ҳурмат руҳида тарбиялаш кўзда тутилган. Мажлисда мазкур лойиҳа доирасидаги фаолият таҳлил этилиб, бу борада тарғибот ишларини суст олиб борган ҳудудий ташкилотлар фаолияти қониқарсиз, деб топилди.
Партия Ижроия қўмитаси йиғилишида жорий йил — сайловлар йили эканини инобатга олган ҳолда партиянинг ҳудудий кенгашлари олдида турган бир қатор вазифалар хусусида ҳам сўз юритилди. Жумладан, ҳудудий партия кенгашларидаги мавжуд вакант ўринларни сиёсий билими етук, ташаббускор кадрлар билан тўлдириш, партия лойиҳалари доирасида амалий ишларни кўпайтиришга доир топшириқлар берилди.
Шунингдек, таҳлиллардан келиб чиқиб, ҳудудий ташкилотларнинг моддий-техник базасини яхшилаш, ташкилотларимиз жойлашган биноларни таъмирлаш ва шу каби бошқа бир қатор ишлар жорий йилнинг 1 июнь санасига қадар якунига етказиш лозимлиги таъкидланди.
Йиғилишда партия фаолиятига оид бошқа бир қатор муҳим масалалар ҳам кўриб чиқилди. Муҳокама этилган барча масалалар юзасидан партия Сиёсий Кенгаши Ижроия қўмитасининг қарорлари қабул қилинди.
Баҳром БУРҲОНИДДИНОВ,
Ўзбекистон “Адолат” СДП
Матбуот хизмати раҳбари
...
Бугун Республика олимпия захиралари мактаб-интернатида Ўзбекистон “Адолат” социал-демократик партияси ва Ўзбекистон белбоғли кураш федерацияси ҳамкорлигида белбоғли кураш бўйича “Адолат” кубоги мусобақасининг республика босқичи ўтказилди.
Мазкур мусобақа давлатимиз раҳбарининг ёшлар маънавиятини юксалтириш ва уларнинг бўш вақтини мазмунли ташкил этиш бўйича 5 та муҳим ташаббусини рўёбга чиқариш, ўсиб келаётган ёш авлодни соғлом, бақувват ва баркамол қилиб тарбиялаш, спортчи ёшларни миллий қадриятларимизни эъзозлаш ва Ватанга муҳаббат руҳида тарбиялаш ҳамда белбоғли кураш спорт турини аҳоли, айниқса, ёшлар ўртасида оммалаштириш мақсадида ташкил этилди.
Шу муносабат билан ўтказилган тадбирда Олий Мажлис Қонунчилик палатаси Спикери ўринбосари ва депутатлари, Ўзбекистон Республикаси Жисмоний тарбия ва спорт вазирлиги, Ўзбекистон “Адолат” СДП фаоллари, Миллий Олимпия қўмитаси ва Ўзбекистон белбоғли кураш федерацияси вакиллари, ушбу беллашувнинг ҳудудий босқичлари ғолиблари ҳамда оммавий ахборот воситалари ходимлари иштирок этди.
Таъкидланганидек, юртимизда спортни ривожлантириш, ёшларни жисмонан ва маънан соғлом қилиб тарбиялаш мақсадида кенг кўламли ишлар амалга оширилмоқда. Халқаро мусобақалар, олимпиадаларда спортчиларимиз ютуқларга эришиб, Ватанимиз шарафини улуғлаб келмоқда.
— Кейинги икки йил давомида жисмоний тарбия ва спорт соҳасига доир қабул қилинган бир қатор фармон ва қарорларда аҳолининг соғлом турмуш тарзини шакллантириш ва жисмоний фаоллигини оширишга қаратилган бир қатор вазифалар белгиланди, — деди партия Сиёсий Кенгаши раиси ўринбосари Абдукамол Раҳмонов. — Президентимиз Шавкат Мирзиёевнинг 2018 йилда Олий Мажлисга тақдим қилган Мурожаатномасида мамлакатимизда спортни жадал ривожлантириш, халқаро мусобақаларда юксак натижаларга эришган спортчиларни рағбатлантириш ва қўллаб-қувватлашга бундан буён ҳам катта аҳамият бериш, ёшлар ўртасида спортни оммалаштириш кераклиги алоҳида таъкидланган.
Партиямиз бир неча йилдан буён Ўзбекистон белбоғли кураш федерацияси билан ҳамкорлик қилиб келмоқда. “Адолат” кубоги мусобақаларининг ўтказилиши эса ҳамкорлигмизни янги босқичга олиб чиқди, деб ўйлаймиз.
Ҳозирги кунда мамлакатимизнинг барча ҳудудларида мазкур спорт тури билан кўплаб ёшларимиз мунтазам шуғулланмокда. Азал-азалдан турли сайилларда, тўй ва бошқа тадбирларда бир-биридан қизиқарли беллашувлар ўтказилган. Бу беллашувларда кураги ерга тегмаган полвонларимиз юртимиз довруғини дунёга танитганлар. Узоқ тарихга эга бўлган белбоғли кураш ўзбек полвонларининг маҳорати, матонатини намоён этиб келади.
Белбоғли кураш спорт турини кенг тарғиб қилиш, жамиятда соғлом турмуш тарзини шакллантириш, ёшларда мардлик ва ватанпарварлик, она Ватанга садоқат туйғуларини камол топтиришда партия депутатлари Ўзбекистон белбоғли кураш федерациясининг ҳудудий кенгашлари билан ҳамкорликда жойларда сайловчилар ҳамда ёшлар билан ўтказаётган учрашувлар, мусобақалар амалий аҳамият касб этмоқда.
Мамлакатимиз келажагини соғлом ва ҳар томонлама уйғун ривожланган ёшлар қўлида, деб ҳисобловчи Ўзбекистон “Адолат” социал-демократик партияси ва Ўзбекистон белбоғли кураш федерацияси ўртасида имзоланган ҳамкорлик меморандуми доирасида жорий йилнинг март-апрель ойларида белбоғли кураш бўйича “Адолат” кубоги мусобақасининг туман, шаҳар ва ҳудудий босқичлари очиқлик, ошкоралик, рақобат мезонлари асосида ўтказилди.
136 та туман, шаҳарларда ўтказилган саралаш ҳамда ҳудудий босқичлардаги беллашувларда 7 500 нафардан ортиқ ёш полвонлар иштирок этишди.
Мусобақанинг республика босқичида ҳудудларда ғолибликни қўлга киритган, Қорақалпоғистон Республикаси, вилоятлар ҳамда Тошкент шаҳри қатнашчилари — 2000, 2001 ҳамда 2002 йилда туғилган ўғил болалар 6 вазн тоифасида (55, 60, 65, 71, 77, 83 кг. вазн тоифасида) 80 дан ошиқ энг сара полвонлар ўзаро куч синашди.
Халқимиз ўртасида ҳалоллик, мардлик, жасорат намунаси ҳисобланиб, ёш авлоднинг маънавий ва жисмоний жиҳатдан ривожланишида алоҳида аҳамиятга эга бўлган мазкур спорт тури бўйича беллашувлар бошланишидан аввал Президентимизнинг 5 ташаббусига ҳамоҳанг равишда санъат усталарининг бадиий чиқишлари мусобақа иштирокчилари ва томошабинларни хушнуд этди. Шунингдек, ёшлар ўртасида китобхонликни кенг тарғиб қилиш, уларнинг ҳуқуқий маданиятини ошириш мақсадида бадиий ҳамда ҳуқуқий адабиётлар ярмаркаси ташкил этилди.
Кўтаринки руҳда бошланган мусобақа қизиқарли ва муросасиз беллашувларга бой бўлди. Бир-биридан маҳоратли полвонлар баҳсида кучлилар орасидан энг кучлилар ғолиблик шоҳсупасига кўтарилди.
Якуний натижаларга кўра, энг кўп совринли ўринларни эгаллаган Андижон вилояти жамоаси умумжамоа ҳисобида “Адолат” кубоги республика мусобақаси ғолиби бўлди. Мусобақада Тошкент шаҳридан Ҳасан Азимов (55 кг.), Андижон вилоятидан Ойбек Султонов (60 кг.), Нусратбек Султонбоев (65 кг.) ва Рўзиохун Рўзиохунов (71 кг.), Фарғона вилоятидан Раҳматилла Анваржонов (77 кг.), Тошкент шаҳридан Нодир Аҳаджонов (83 кг.) 1-ўринга сазовор бўлишди Мазкур вазн тоифаларида Камронбек Ортиқов (Андижон), Жаҳонгир Ҳаитов (Наманган), Холмирза Ҳасанбоев, Шаҳзод Мирзаёров (Тошкент шаҳри), Мангуберди Имянов, Сардор Тўлаев (Тошкент вилояти) иккинчи ўринни эгаллаган бўлса, ҳар бир вазн тоифасида икки нафардан иштирокчи 3-ўринга лойиқ топилиб, ғолиблар сафидан жой олишди.
— Узоқ йиллик тарихга эга белбоғли кураш спорт тури бугун нафақат мамлакатимизда, балки жаҳонда ҳам ўз муҳлисларига эга бўлиб бормоқда, — дейди Ўзбекистон белбоғли кураш федерацияси раиси Равшан Дастиров. — Ўзбекистон белбоғли кураш федерацияси Бирлашган кураш оламининг (UWW) ҳақиқий аъзоси ҳисобланади. Мазкур ташкилотнинг дастур-режасига мувофиқ жаҳон чемпионатлари ва кубок мусобақалари мунтазам ўтказиб келинмоқда. Ўзбекистон “Адолат” социал-демократик партияси ташаббуси билан ўтказилаётган мазкур мусобақа юқори савияда ўтказилгани билан аҳамиятлидир. Чунки ушбу беллашув жорий йилнинг 18-21 июнь куни Олмалиқ шаҳри мезбонлик қиладиган, ёшлар ўртасида ўтказиладиган жаҳон чемпионати олдидан терма жамоа аъзоларига номзодларни яна бир бор саралаб олиш имкониятини берди.
ўолиблар мусобақа ташкилотчилари томонидан диплом ҳамда қимматбаҳо совғалар билан тақдирланди. Умумжамоа ҳисобида ғолиб бўлган Андижон вилояти жамоасига “Адолат” кубоги топширилди.
Ўзбекистон “Адолат” СДП
Матбуот хизмати
...
Давлатимиз раҳбари 2017 йил 2-3 июнда Андижон вилоятига ташрифи чоғида Андижон шаҳрида Муҳаммад Юсуф номидаги она тили ва адабиёти фанини чуқурлаштириб ўқитишга ихтисослаштирилган мактаб ташкил этиш таклифини билдирган эди. Шунга мувофиқ ўша йили июлда Ўзбекистон Республикаси Вазирлар Маҳкамасининг тегишли қарори қабул қилиниб, 11 декабрда мазкур мактаб очилган эди.
Президент Шавкат Мирзиёев Андижон шаҳридаги Муҳаммад Юсуф номидаги мактаб-интернатга ташриф буюрди.
Мактаб олдида шоир бюсти ўрнатилган хиёбон барпо этилган. Билим даргоҳида умумтаълим фанлари билан бирга, она тили ва адабиётни чуқур ўрганиш учун барча шароитлар яратилган. Синфхоналар, кутубхона, спорт зали, ётоқхона замонавий жиҳозланган. Бугунги кунда бу ерда 150 нафар иқтидорли йигит-қиз таълим олмоқда.
Шавкат Мирзиёев Муҳаммад Юсуфнинг ҳаёти ва ижодига бағишланган мўъжазгина музейни кўрди. Мактаб ўқувчилари шоир шеърларидан намуналар ўқиб берди.
– Муҳаммад Юсуф ҳалқимиз севган самимий шоир, ватанпарвар инсон эди. Сизлар унинг муносиб давомчилари бўлишингиз керак. Бунинг учун бир дақиқаям вақтларингизни бехуда ўтказмай, кўпроқ ўқиб, тарихга уйғоқ боқиб камолга етишларингиз зарур. Энг катта бойлик – маънавий бойликдир, - деди Президент.
Давлатимиз раҳбари мутасаддиларга мактаб-интернат ўқувчилари учун автобус ажратиш, бошқа вилоятлардаги ижод мактабларига бориб, тенгдошлари билан мулоқот қилишига кўмаклашиш, вилоят телевидениесида ўқувчилар иштирокида кўрсатувлар тайёрлаш бўйича топшириқ берди.
Президентимизнинг Андижон вилоятига ташрифи якунланди.
Манба: Ўзбекистон Республикаси Президенти
Матбуот хизмати
...
Барчамизга маълумки, жорий йилнинг 19 март куни Муҳтарам Президентимиз Ш.Мирзиёев раислигида бўлиб ўтган видеоселектор йиғилишида ёшлар маънавиятини юксалтириш, уларнинг бўш вақтини мазмунли ташкил этиш мақсадида китоб мутолаасига қизиқишларини ошириш масаласи кенг муҳокама қилинган эди.
Йиғилишда Президентимиз ҳар бир раҳбар ўз шахсий кутубхонасидан ўзи таълим олган мактаб кутубхонасига китоблар совға қилса, бундай эзгу ташаббус китобхонликни ривожлантиришга хизмат қилиши, фарзандларимиз тарбиясига ижобий таъсир кўрсатишини таъкидлаган эди.
Президентимизнинг ушбу ташаббусларини қўллаб-қувватлаган ҳолда Ўзбекистон «Адолат» СДП Қораўзак туман Кенгаши раиси А.Гулимбетов ва Халқ депутатларни Қораўзак туман Кенгаши депутати М.Гулимбетовлар тумандаги 2-сонли ихтисослаштирилган давлат умумтаълим мактабига бадиий китоблар совға қилишди.
Айшолпан ОРАЗИМБЕТОВА,
Ўзбекистон “Адолат” СДП
Қорақалпоғистон Республикаси
ҳудудийКенгаши
матбуот котиби
...
Инсон ўзини бахтли ҳис этиши учун доимо тетик ва фаол бўлиши керак. Бунда эса спорт билан шуғулланишнинг ўрни ва аҳамияти катта. Мутахассисларнинг айтишларича, жисмоний ҳаракатлар бир пайтнинг ўзида мия фаолиятини ҳам янада яхшилар экан. Шу боис юртимизда спорт турларини ривожлантиришга қаратилаётган эътибордан жуда хурсандман. Чекка-чекка ҳудудларда ҳам спорт комплексларини барпо этилаётгани спортсеварлар учун айни муддао бўлмоқда. Шу йилнинг 19 март санасида Президентимиз видеоселектор йиғилишида ўртага ташлаган 5 та ташаббуснинг бири спорт йўналиши бўлганлиги ҳам бежиз эмас. Буларнинг барча-барчаси бизни қувонтиради. Мана бугун Ўзбекистон “Адолат” социал-демократик партияси ташаббуси билан “Адолат” кубогининг Республика финал босқичи ўтказилмоқда. Биз мусобақанинг қуйи босқичларида яхши натижаларга эришганимиз сабаб шу жойгача етиб келдик. Албатта, мақсадимиз бу ерда ҳам совринли ўринларни қўлга киритиш. Чунки, Фарғона азал-азалдан полвонлар юрти бўлган. Ота-боболаримиз давраларда ҳалол бел олишиб, ғолиб бўлиб, одамларнинг меҳрини, ҳурматини қозонган. Бу бизни фахрлантиради. Мен белбоғли курашни мардлик ва жасурлик рамзи ҳисоблайман. Биз рақибларимиз билан беллашадиган гилам, майдон муқаддас жой. Ҳар бир курашчи, ҳар бир спортчи буни яхши тушуниши керак. Биз фарғоналиклар мусобақадан ғолиблик нашидаси билан ортга қайтишни ният қилганмиз. Бироқ, рақибларимизга ҳам ҳурмат-эҳтиромимиз катта. Ўйлайманки, ушуб мусобақа бизларни халқаро мусобақаларда ҳам иштирок этишимизга, уларда яхши ютуқларга эришиб, юртимиз байроғини баланд кўтаришимизга замин ҳозирлайди.
Жавоҳир АБДУҚОСИМОВ,
“Адолат” кубоги мусобақасининг
Республика финал босқичи иштирокчиси,
Фарғона вилояти
...
Давлатимиз раҳбари 2017 йил 2-3 июнда Андижон вилоятига ташрифи чоғида Андижон шаҳрида Муҳаммад Юсуф номидаги она тили ва адабиёти фанини чуқурлаштириб ўқитишга ихтисослаштирилган мактаб ташкил этиш таклифини билдирган эди. Шунга мувофиқ ўша йили июлда Ўзбекистон Республикаси Вазирлар Маҳкамасининг тегишли қарори қабул қилиниб, 11 декабрда мазкур мактаб очилган эди.
Президент Шавкат Мирзиёев Андижон шаҳридаги Муҳаммад Юсуф номидаги мактаб-интернатга ташриф буюрди.
Мактаб олдида шоир бюсти ўрнатилган хиёбон барпо этилган. Билим даргоҳида умумтаълим фанлари билан бирга, она тили ва адабиётни чуқур ўрганиш учун барча шароитлар яратилган. Синфхоналар, кутубхона, спорт зали, ётоқхона замонавий жиҳозланган. Бугунги кунда бу ерда 150 нафар иқтидорли йигит-қиз таълим олмоқда.
Шавкат Мирзиёев Муҳаммад Юсуфнинг ҳаёти ва ижодига бағишланган мўъжазгина музейни кўрди. Мактаб ўқувчилари шоир шеърларидан намуналар ўқиб берди.
– Муҳаммад Юсуф ҳалқимиз севган самимий шоир, ватанпарвар инсон эди. Сизлар унинг муносиб давомчилари бўлишингиз керак. Бунинг учун бир дақиқаям вақтларингизни бехуда ўтказмай, кўпроқ ўқиб, тарихга уйғоқ боқиб камолга етишларингиз зарур. Энг катта бойлик – маънавий бойликдир, - деди Президент.
Давлатимиз раҳбари мутасаддиларга мактаб-интернат ўқувчилари учун автобус ажратиш, бошқа вилоятлардаги ижод мактабларига бориб, тенгдошлари билан мулоқот қилишига кўмаклашиш, вилоят телевидениесида ўқувчилар иштирокида кўрсатувлар тайёрлаш бўйича топшириқ берди.
Президентимизнинг Андижон вилоятига ташрифи якунланди.
Манба: Ўзбекистон Республикаси Президенти
Матбуот хизмати
...
Президент Шавкат Мирзиёев раҳбарлигида Андижон вилояти ҳокимлигида фаоллар йиғилиши бўлиб ўтди.
Мамлакатимизнинг барча ҳудудлари каби Андижон вилоятида ҳам катта ўзгаришлар юз бермоқда. Хусусан, ўтган йили вилоят ялпи ҳудудий маҳсулоти 12 фоиз, инвестициялар 19 фоиз ўсган. Жорий йил биринчи чоракда ҳам ўсиш суръатлари кузатилган.
Шунга қарамай, ҳали вилоятда имкониятлар кўплиги, иқтисодиёт диверсификация қилинмагани таъкидланди. Жумладан, вилоят саноатининг 80 фоизи Асака тумани ва Андижон шаҳрига тўғри келиб, бошқа туманларда саноат деярли ривожланмагани кўрсатиб ўтилди. Иқтисодий фаол аҳолининг кўпчилиги ишсиз, киши бошига тўғри келадиган хизмат кўрсатиш ҳажми етарли эмаслиги қайд этилди.
Шу боис Андижон вилоятида 2019-2020 йилларда амалга ошириладиган қиймати 25 триллион 181 миллиард сўм бўлган 908 та лойиҳадан иборат инвестиция дастури ишлаб чиқилди. Ушбу лойиҳалар жами 1,7 миллиард доллар тўғридан-тўғри хорижий сармояни ўзлаштириш ва 35 мингдан зиёд иш ўрни яратишни таъминлайди.
Бундан ташқари, тадбиркорлик фаолиятини бошлаш истаги бўлган оилаларни аниқлаб, «Ҳар бир оила - тадбиркор» дастури доирасида 420 миллиард сўм имтиёзли кредитлар ажратилиши белгиланди.
Йиғилишда ижтимоий соҳаларни ривожлантириш масалаларига ҳам алоҳида эътибор қаратилди. Жорий йилда Андижон шаҳрида 14 та кўп қаватли арзон уй ва кўплаб тижорат уйлари, қишлоқ жойларда 224 та намунали уй-жой ва 56 та кўп қаватли арзон турар жойлар қурилиши маълум қилинди.
Президентимиз вилоят аҳолиси ўсиб бораётгани яна кўплаб уйлар ва қўшимча иш ўринлари, ижтимоий ва коммунал хизматлар ташкил этишни талаб қилиши, бунинг учун вазирликлар ва вилоят раҳбарлари узоқни кўзлаб, ўзини қийнаб ишлаши зарурлигини таъкидлади.
Манба: Ўзбекистон Республикаси Президенти
Матбуот хизмати
...
Сўлим табиати билан машҳур Хонободда бир пайтлар қурила бошлаган санаторий қаровсиз ҳолда қолиб кетган эди. Президент Шавкат Мирзиёев 2017 йил 2 июнда бу ерга келиб, уни ободонлаштириш, аҳоли дам олиши учун зарур шароитлар яратиш бўйича топшириқлар берган эди.
Ўтган йили бу ерда 180 ўринли замонавий сиҳатгоҳ ишга туширилди. Даволаш бинолари, стандарт, яримлюкс ва люкс хоналар, 6 та апартаментда барча шароитлар яратилди.
Денгиз сатҳидан 850 метр баландликда жойлашган ушбу маскан тоза ҳавоси ва шифобахш суви билан нафас йўллари, асаб тизими, юрак қон-томир касалликларини даволашга ихтисослашган. Минерал ванналар, физиотерапия, электрофорез, гальванизация, игна билан даволаш, стоматология, косметология, галотерапия йўлга қўйилган.
Давлатимиз раҳбари санаторийда яратилган шароитларни кўздан кечирди. Энди ушбу тоғли ҳудудда енгил конструкциялардан меҳмон уйлари ташкил этиш зарурлигини таъкидлади. Шавкат Мирзиёев бу хизматлар нархини камайтириб, қамровни кенгайтириш, яна кўплаб одамларни иш билан таъминлашга хизмат қилишини қайд этди.
Шу ерда Андижон вилоятида туризмни ривожлантиришга доир лойиҳалар тақдимоти ўтказилди. Хонободлик фаоллар, нуронийлар билан мулоқот бўлиб ўтди.
Манба: Ўзбекистон Республикаси Президенти
Матбуот хизмати
...
Ўзбекистон Республикаси Президенти Шавкат Мирзиёев 16 май куни Андижон вилоятига келди.
Давлатимиз раҳбари дастлаб Хонобод шаҳридаги «Xon tex city» масъулияти чекланган жамияти фаолияти билан танишди.
Маълумки, Хонобод шаҳри узоқ йиллар ёпиқ ҳудуд бўлиб, саноат ривожланмаган, кўплаб объектлар бўшаб қолган эди. Президентимиз 2017 йил 2 июнда бу ерга ташриф буюриб, ижтимоий-иқтисодий шароит билан яқиндан танишган, вазиятни тубдан яхшилаш бўйича чора-тадбирлар белгилаб берган эди.
Шу асосида 2017-2019 йилларда Хонобод шаҳрини комплекс ривожлантириш бўйича дастур ишлаб чиқилди. Унга 3 минг 200 дан зиёд лойиҳалар киритилиб, 500 миллиард сўм маблағ йўналтирилди. Бунинг натижасида кўплаб корхоналар ташкил этилиб, одамлар иш билан таъминланди.
Анҳор маҳалласи ҳудудидаги собиқ 4-автокорхона ҳам узоқ йиллар бўш турган эди. Унинг бинолари ва ер майдони тадбиркорларга "ноль" қийматда бўлиб берилиб, ташкилий, молиявий жиҳатдан қўллаб-қувватланди. Бугун бу ерда катта-кичик 13 та корхона фаолият юритмоқда. Уларда жами 685 киши ишламоқда.
«Xon tex city» масъулияти чекланган жамияти шулардан бири. Ўтган йили ишга туширилган корхонада 50 турдаги тайёр кийим-кечаклар 300 дан ортиқ моделда ишлаб чиқарилмоқда. Йилига 500 минг долларлик маҳсулот экспорт қилиш режалаштирилган. Энг муҳими, илгари ишсиз бўлган 300 га яқин хотин-қиз бандлиги таъминланган.
Давлатимиз раҳбари корхонадаги шароитларни кўздан кечирди, ишчи хотин-қизлар билан мулоқот қилди.
- Ҳамма ҳаракатларимиз, фармон ва қарорларимиз замирида халқимиз ҳаётини яхшилаш, фарзандларимизнинг эртанги кунига замин яратиш мақсади мужассам. Шу борадаги ўзгаришларни, сизларнинг ҳаётдан розилигингизни кўриб хурсанд бўлдим. Андижонга бу галги ташрифимиздан ҳам мақсад - одамларнинг ҳақиқий талабидан келиб чиқиб режа қилиш, уларни таъминлаш чораларини кўриш, - деди Шавкат Мирзиёев.
Манба: Ўзбекистон Республикаси Президенти
Матбуот хизмати
...
Ўзбекистон Республикаси Президенти Шавкат Мирзиёев 15 май куни "Ўзбекистон нефти ва гази" халқаро кўргазмаси тадбирларида иштирок этиш мақсадида мамлакатимизда бўлиб турган «ЛУКОЙЛ» компанияси президенти Вагит Алекперовни қабул қилди.
Давлатимиз раҳбари меҳмонни қутлар экан, мамлакатимиз нефть-газ тармоғида етакчи бўлган ушбу Россия компанияси билан самарали ҳамкорлик изчил ривожланиб бораётганини алоҳида қайд этди.
Бугунги кунда "ЛУКОЙЛ" компанияси Ўзбекистонда амалга оширилаётган қўшма лойиҳаларга киритган инвестициялар ҳажми 7,5 миллиард доллардан зиёдни ташкил этмоқда.
Ўтган йил апрель ойида ишга туширилган Қандим газни қайта ишлаш мажмуаси лойиҳа қувватига чиқди. "Ҳовузак" ва "Шоди" конлари, шунингдек, Жануби-Ғарбий Ҳисор конлари ўзлаштирилмоқда.
Учрашувда ўзаро манфаатли ҳамкорлик истиқболлари, жумладан, янги инвестиция дастур ва лойиҳаларини тайёрлаш ҳамда «ЛУКОЙЛ» компаниясининг мамлакатимиздаги фаолиятини кенгайтириш масалалари кўриб чиқилди.
Вагит Алекперов Президентимизга самимий қабул ва қўшма лойиҳаларни ҳар томонлама қўллаб-қувватлаётгани учун чуқур миннатдорлик билдирди.
"ЛУКОЙЛ" компанияси раҳбари Ўзбекистон билан нефть-газ тармоғида узоқ муддатли ва кенг кўламли шерикликни янада ривожлантиришга тайёр эканини таъкидлади.
Манба: Ўзбекистон Республикаси Президенти
Матбуот хизмати
...
Халқимизнинг миллий ўзлигини, қадимий тарихи ва тилини, унинг ҳаёт тарзи, анъана ва урф-одатларини ўзида мужассам этадиган, умумбашарий маданиятнинг ажралмас қисми сифатида тан олинган бахшичилик санъати атоқли бахши-шоирларимиз, фольклоршунос олимларимизнинг фидойи меҳнати, ижодий тафаккури билан асрлардан асрларга ўтиб келмоқда.
Халқимизнинг юксак бадиий даҳоси билан яратилган ушбу ноёб санъатни асраб-авайлаш ва ривожлантириш бўйича мамлакатимизда муайян ишлар амалга оширилмоқда. Бу борада юртимизда “Алпомиш” достонининг минг йиллиги кенг нишонлангани, Термиз шаҳрида бу улуғ бадиий обида шарафига, Самарқанд шаҳрида атоқли бахшиларимиз хотирасига бағишланган ёдгорлик мажмуалари бунёд этилгани, давлатимиз томонидан “Ўзбекистон Республикаси халқ бахшиси” фахрий унвони таъсис қилинганини қайд этиш лозим.
Бугунги кунда Термиз шаҳрида бахшичилик мактаби, республикамиздаги болалар мусиқа ва санъат мактабларида фольклор синфлари фаолият кўрсатмоқда. Юртимизда кўп томлик “Қорақалпоқ фольклори” тўпламлари чоп этилди, 100 томлик “Ўзбек халқ ижоди ёдгорликлари” мажмуаси нашр этилмоқда. Бахши-шоирлар томонидан ижро этилаётган асарларни ёзиб олиш, уларни илмий ўрганиш ишлари давом этмоқда.
Яқинда Термиз шаҳрида илк бор ўтказилган Халқаро бахшичилик санъати фестивали халқаро миқёсдаги йирик маданий ҳодиса сифатида кенг эътироф этилгани алоҳида эътиборга лойиқ.
Айни вақтда ҳозирги глобаллашув даврида, тижорат воситасига айланган “оммавий маданият”, шоу-бизнеснинг салбий таъсири тобора кучайиб бораётган бир шароитда фольклор санъатига эътибор ва қизиқиш сусайиб бораётгани, кўп жойларда унутилиб, ҳимоя ва муҳофазага муҳтож бўлиб тургани кузатилмоқда.
Халқимиз маданиятининг ҳаётбахш сарчашмаси бўлган бахшичилик санъатини янада ривожлантириш, унинг миллий маданиятимиз ва санъатимиздаги ўрни ва аҳамиятини юксалтириш, ёш авлодни миллий ўзликни англаш, Ватанга садоқат, тарихий меросга ҳурмат руҳида тарбиялаш мақсадида:
1. Ўзбекистон Республикаси Маданият вазирлиги, Фанлар академияси, Ёзувчилар уюшмаси ва Сурхондарё вилояти ҳокимлигининг Термиз шаҳрида давлат муассасаси шаклида Республика Бахшичилик санъати марказини (кейинги ўринларда – Марказ) ҳамда унинг ҳузурида юридик шахс мақомига эга бўлган Бахшичилик санъатини ривожлантириш жамғармасини (кейинги ўринларда – Жамғарма) ташкил этиш ҳақидаги таклифлари маъқуллансин.
2. Марказнинг асосий вазифалари этиб қуйидагилар белгилансин:
бахшичилик санъатининг илмий-назарий ва амалий асосларини чуқур ўрганиш ва мустаҳкамлаш;
соҳада шаклланган ижодий мактабларнинг ўзига хос ижро услублари, “устоз-шогирд” анъаналарини қайта тиклаш ва ривожлантириш;
бахши-шоирлар, фольклоршунос олимлар, ўқитувчи ва мутахассисларнинг ижодий ва илмий фаолиятини қўллаб-қувватлаш;
маданият марказлари, болалар мусиқа ва санъат мактаблари ва бошқа таълим муассасалари қошида бахшичилик санъати тўгаракларини ташкил этиш;
бахши-шоирлар ижодига кенг йўл очиб бериш, оммавий байрамлар ва маданий тадбирларда уларнинг фаол иштирокини таъминлаш;
бахшичилик санъатининг сара намуналарини тўплаш ва фондини яратиш, уларнинг аудио ва видео вариантларини кўпайтириш, бу соҳани юртимизда ва дунёда кенг тарғиб этиш учун ахборот-коммуникация технологияларидан, телевидение ва Интернет имкониятларидан самарали фойдаланиш;
бахшичилик санъати йўналишида халқаро ҳамкорликни кучайтириш, бу борада ўзаро тажриба алмашишни йўлга қўйиш, жумладан, турли халқаро анжуманлар ва танловлар, концертлар ва маҳорат дарсларини ташкил этиш.
3. Жамғарманинг асосий вазифалари этиб қуйидагилар белгилансин:
молиявий ва ташкилий йўналишларда комплекс чора-тадбирларни амалга ошириш асосида бахшичилик санъатини янада ривожлантиришга кўмаклашиш;
мамлакатимизда фаолият кўрсатаётган бахши-шоир, оқин ва жировларни ҳар томонлама қўллаб-қувватлаш;
Маданият вазирлиги тизимидаги муассасаларни бахшичилик санъатига оид зарур адабиётлар, ўқув қўлланмалар ва даврий нашрлар билан таъминлаш;
маданият ва санъат муассасалари қошидаги бахшичилик тўгаракларининг моддий-техник базасини мустаҳкамлаш, уларни зарур чолғулар ва жиҳозлар билан таъминлаш;
бахшичилик санъати билан боғлиқ илмий-тадқиқотлар, нашр ишлари ҳамда комплекс илмий экспедицияларни молиялаштириш;
бахшичилик санъатига доир ҳомийликни ривожлантириш, соҳага хорижий сармоя ва грантларни жалб этиш;
қонунчиликда белгиланган манбалардан тушадиган маблағларни жамғариш, улардан мақсадли ва самарали фойдаланишни таъминлаш.
4. Қуйидагилар:
Бахшичилик санъатини янада ривожлантириш бўйича чора-тадбирлар режаси 1-иловага;
Республика Бахшичилик санъати марказининг таркибий тузилмаси 2-иловага;
Республика Бахшичилик санъати маркази ҳузуридаги Бахшичилик санъатини ривожлантириш жамғармаси Кенгашининг таркиби 3-иловага;
Республика Бахшичилик санъати маркази ҳузуридаги Бахшичилик санъатини ривожлантириш жамғармаси ижрочи дирекцияси тузилмаси 4-иловага мувофиқ тасдиқлансин.
Ўзбекистон Республикаси маданият вазирига, зарурат бўлганда, Марказ ва Жамғарма тузилмаларига ходимларнинг белгиланган умумий сони доирасида ўзгартиришлар киритиш ҳуқуқи берилсин.
5. Ўзбекистон Республикаси Маданият вазирлиги:
икки ой муддатда Марказ ва Жамғарма фаолиятини ташкил этиш тўғрисидаги қарор лойиҳасини Вазирлар Маҳкамасига киритсин. Бунда Жамғарма маблағларини шакллантириш манбалари назарда тутилсин;
Молия вазирлиги, Инвестициялар ва ташқи савдо вазирлиги, Иқтисодиёт ва саноат вазирлиги ҳамда Сурхондарё вилояти ҳокимлиги билан биргаликда икки ой муддатда Термиз шаҳридаги бахшичилик мактаби негизида бахшичилик санъатига ихтисослаштирилган Республика мактаб-интернатини ташкил этиш юзасидан Вазирлар Маҳкамасига таклиф киритсин;
Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда бахшичилик санъати ривожи учун зарур бўлган мусиқа чолғулари (дўмбира, сибизға, чанқовуз, қўшнай, ғажирнай, бўламон, қўбиз кабилар) ишлаб чиқарадиган усталар фаолиятини қўллаб-қувватлаш, устахоналар учун жой ажратиш, махсус ёғоч ва металл маҳсулотлари билан таъминлаш чораларини белгиласин;
Ўзбекистон композиторлари ва бастакорлари уюшмаси билан биргаликда бахши-шоир, жиров ва оқинлар томонидан ижро этиладиган асарлар куйларини ноталаштириш ишларини босқичма-босқич амалга оширсин;
ЮНЕСКО ишлари бўйича Ўзбекистон Республикаси Миллий комиссияси билан биргаликда ўзбек халқининг кўҳна ва бетакрор санъати намунаси бўлган бахшичилик санъатини ЮНЕСКОнинг Инсоният номоддий маданий меросининг репрезентатив рўйхатига киритиш бўйича чора-тадбирларни амалга оширсин;
Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда Қорақалпоғистон Республикаси, Сурхондарё, Қашқадарё, Хоразм вилоятларида бахшичилик санъати давлат ансамблларини, ушбу санъат тури ривожланган бошқа ҳудудларда эса вилоят ансамблларини ташкил этсин;
тегишли ҳудудларда болалар мусиқа ва санъат мактаблари қошида бахшичилик санъати синфларини ташкил этсин;
Ўзбекистон Республикаси Адлия вазирлиги билан биргаликда бир ой муддатда қонун ҳужжатларига ушбу қарордан келиб чиқадиган ўзгартириш ва қўшимчалар тўғрисида Вазирлар Маҳкамасига таклиф киритсин.
6. Сурхондарё вилояти ҳокимлиги Марказ ва Жамғарма учун бино ажратиш, унинг моддий-техник базасини мустаҳкамлаш ҳамда автотранспорт воситаси билан таъминлаш чораларини кўрсин.
7. Ўзбекистон Миллий ахборот агентлиги, Ўзбекистон Миллий телерадиокомпанияси ва бошқа оммавий ахборот воситаларига устоз бахшилар ва достончилар, ёш ижрочилар, бахшичилик санъати дурдонаси ҳисобланган машҳур достонлар ҳақида кўрсатув ва эшиттиришлар, мақолалар тайёрлаш ва эълон қилиб бориш ҳамда мазкур қарорда белгиланган тадбирларни кенг ёритиш тавсия этилсин.
8. Мазкур қарорнинг ижросини назорат қилиш Ўзбекистон Республикасининг Бош вазири А.Н.Арипов ва Ўзбекистон Республикаси Президенти маслаҳатчисининг ўринбосари Ф.Ш.Маҳмудов зиммасига юклансин.
Ўзбекистон Республикаси
Президенти Ш.МИРЗИЁЕВ
Тошкент шаҳри,
2019 йил 14 май
...
Кейинги йилларда республикада тадбиркорликни ривожлантириш, инвестицияларни жалб қилиш ва бизнесни юритиш учун қулай муҳит яратиш, тадбиркорларнинг қонуний манфаатларини ҳимоя қилишнинг ҳуқуқий кафолатларини мустаҳкамлаш соҳасида кенг кўламли ишлар амалга оширилди.
Жумладан, солиқ тизими тубдан ислоҳ қилинди, рухсат берувчи ҳужжатларни олиш тартиби сезиларли даражада соддалаштирилди, тадбиркорлик субъектларининг молиявий-хўжалик фаолияти билан боғлиқ бўлмаган режали текширишлар бекор қилинди.
2019 йилнинг I чораги якунлари бўйича лойиҳаларни амалга оширишга 16,4 триллион сўм ҳажмда кредитлар ажратилди, иқтисодиётда инвестицияларни ўзлаштириш ҳажмлари 1,3 бараварга, янгидан ташкил этилган тадбиркорлик субъектлари сони 2,3 бараварга ўсди.
Шу билан бирга, таҳлил ҳозирги вақтда аҳолини тадбиркорлик фаолиятига кенгроқ ва фаол жалб этишга тўсқинлик қилувчи, биринчи навбатда давлат органларининг тадбиркорлар билан мулоқот қилишнинг амалий ва шаффоф тизими мавжуд эмаслиги билан боғлиқ бўлган бир қанча салбий омиллар сақланаётганлигини кўрсатади. Хусусан:
биринчидан, тадбиркорларни қабул қилиш ва мурожаатларини кўриб чиқишнинг ягона тизими мавжуд эмас, бу эса юзага келаётган масалаларни тўлиқ қамраб олиш ва тезкорлик билан ҳал этиш имконини бермаяпти, тадбиркорларнинг муаммолари ва мурожаатларини ҳал этишга юзаки муносабатда бўлиш ҳолатлари мавжуд;
иккинчидан, мавжуд тизимли муаммоларни таҳлил қилиш бўйича ишларнинг самарали амалга оширилмаслиги аҳолининг тадбиркорлик фаоллигини ошириш ва ишбилармонлик муҳитини яхшилаш масалаларини сифатли ҳал қилиш имконини бермаяпти;
учинчидан, тадбиркорликни ривожлантиришга ва қулай инвестиция муҳитини шакллантиришга тўсқинлик қилувчи муҳим муаммоларни аниқлаш ва ҳал этиш бўйича вазирликлар, идоралар, маҳаллий ижро этувчи ҳокимият органлари фаолиятини мувофиқлаштиришнинг таъсирчан механизми мавжуд эмас;
тўртинчидан, давлат ва хўжалик бошқаруви органлари раҳбарлари томонидан тадбиркорлар билан бевосита мулоқот қилишга, шунингдек, уларнинг қонуний талабларини аниқлаш ва тезкорлик билан ҳал қилишга ҳамда муаммоларни бартараф этишга етарлича эътибор берилмаяпти;
бешинчидан, тадбиркорларнинг мурожаатлари билан ишлашда,айниқса, жойларда бюрократик тўсиқлар ва ғовлар учраб турибди, “Ҳар бир оила – тадбиркор”дастури ва тадбиркорларнинг кичик ва ўрта бизнесни ривожлантиришга йўналтирилган ташаббусларини ўз вақтида амалга ошириш,ушбу жараёнга ёшлар ва хотин-қизларни жалб қилиш, барқарор янги иш ўринлари яратиш, аҳоли турли тоифаларининг моддий фаровонлигини ошириш барча даражадаги ҳокимликлар ва уларнинг раҳбарлари томонидан зарур даражада қўллаб-қувватланмаяпти.
Тадбиркорларнинг, шу жумладан, чет эллик инвесторларнинг мурожаатлари билан ишлашни ташкил этиш сифати ва тезкорлигини ошириш, улар билан очиқ ва тўғридан-тўғри мулоқотни таъминлаш, уларнинг қонуний талабларини амалий ва самарали рўёбга чиқариш ва муаммоли масалаларни ҳал этиш, ҳудудларнинг ижтимоий-иқтисодий ривожланишига реал ҳиссани кўпайтириш, аҳолининг иш билан бандлигини ошириш ва унинг моддий фаровонлигини ўстириш мақсадида:
1. Ўзбекистон Республикаси Вазирлар Маҳкамаси, Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил, Инвестициялар ва ташқи савдо вазирлиги, Адлия вазирлиги, Давлат солиқ қўмитаси, Савдо-саноат палатасининг Ўзбекистон Республикаси Бош вазирининг Тадбиркорлар мурожаатларини кўриб чиқиш қабулхоналарини (кейинги ўринларда – Тадбиркорлар мурожаатларини кўриб чиқиш қабулхоналари) ташкил этиш тўғрисидаги таклифларига розилик берилсин.
2. Тадбиркорлар мурожаатларини кўриб чиқиш қабулхоналари фаолиятининг асосий йўналишлари этиб қуйидагилар белгилансин:
тадбиркорлик субъектларини ҳамда чет эллик инвесторларни қабул қилиш, шу жумладан, видеоконференцалоқа воситасида ва сайёр қабулларни ўтказиш;
тадбиркорлик субъектларининг, шу жумладан, чет эллик инвесторларнинг ҳуқуқлари ва қонуний манфаатларига риоя қилинишини таъминлаш;
тадбиркорликни ривожлантиришга тўсқинлик қилаётган муаммоли масалаларни кўриб чиқиш ва мавжуд бюрократик, шу жумладан, ер участкалари ва бинолар, кредитлар ажратиш, рухсат берувчи ҳужжатларни олиш масалаларидаги тўсиқларни бартараф этиш;
тадбиркорликни ривожлантиришга ва чет эл инвестицияларини жалб этишга тўсқинлик қилаётган тизимли муаммоларни мониторинг қилиш, умумлаштириш ва таҳлил қилиш, шунингдек, бу соҳадаги қонун ҳужжатларини такомиллаштириш бўйича таклифлар тайёрлаш;
тадбиркорларнинг муаммоларини ҳал этиш мақсадида уларни қабул қилиш, умумлаштириш, мониторинг олиб бориш ва назорат қилиш учун самарали платформа жорий этилишини назарда тутувчи “business.gov.uz” ягона интерактив портали фаолият кўрсатишини таъминлаш.
3. Ўзбекистон Республикаси Вазирлар Маҳкамаси тузилмасидаЎзбекистон Республикаси Бош вазирининг Тадбиркорлар мурожаатларини кўриб чиқиш қабулхоналари фаолиятини ташкил этиш ва мувофиқлаштириш котибияти (кейинги ўринларда – Котибият) 1-иловага мувофиқ ташкил этилсин.
4. Қуйидагилар:
Қорақалпоғистон Республикаси, вилоятлар ва Тошкент шаҳридаги Ўзбекистон Республикаси Бош вазирининг Тадбиркорлар мурожаатларини кўриб чиқиш қабулхоналарининг намунавий тузилмаси 2-иловага мувофиқ;
туманлар ва шаҳарлардаги Ўзбекистон Республикаси Бош вазирининг Тадбиркорлар мурожаатларини кўриб чиқиш қабулхоналарининг намунавий тузилмаси 3-иловага мувофиқ;
Ўзбекистон Республикаси Бош вазирининг Тадбиркорлар мурожаатларини кўриб чиқиш қабулхоналари ишини ташкил этиш схемаси 4-иловага мувофиқ тасдиқлансин.
5. Шундай тартиб ўрнатилсинки, унга мувофиқ:
Тадбиркорлар мурожаатларини кўриб чиқиш қабулхоналарида тадбиркорларни, шу жумладан, чет эллик инвесторларни қабул қилиш ҳокимликлар, Савдо-саноат палатасининг тадбиркорликка кўмаклашиш марказлари, инвестициялар ва савдо, адлия, солиқ инспекцияси, қурилиш, давлат кадастри органлари, банк ва бошқа ташкилотларнинг ҳудудий органлари вакиллари иштирокида тасдиқланган жадвал бўйича ҳар куниамалга оширилади;
мурожаатда кўрсатилган қонуний талаблар ва таклифларни туман ва шаҳар даражасида қаноатлантириш имконияти бўлмаса, улар Қорақалпоғистон Республикаси, вилоятлар ва Тошкент шаҳридаги Тадбиркорлар мурожаатларини кўриб чиқиш қабулхоналарига юборилади;
республика даражасида ҳал этилиши керак бўлган тадбиркорларнинг, шу жумладан, чет эллик инвесторларнинг мурожаатлари кейинчалик Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил, Инвестициялар ва ташқи савдо вазирлиги, Савдо-саноат палатасининг раҳбарлари ва бошқа ваколатли органлар иштирокида кўриб чиқиш учун Котибиятга юборилади;
Ўзбекистон Республикасининг Бош вазири мурожаатлари ваколатли органлар томонидан ҳал этилмаган тадбиркорлик субъектларини, шу жумладан, чет эллик инвесторларни доимий асосда шахсан қабул қилади;
Ўзбекистон Республикаси Бош вазирининг қарори талаб этиладиган тадбиркорларнинг, шу жумладан, чет эллик инвесторларнинг мурожаатлари Котибият томонидан унга кўриб чиқиш ва тегишли қарор қабул қилиш учун киритилади;
тадбиркорларнинг мурожаатларида кўрсатилган масалаларни тартибга солувчи нормалар мавжуд бўлмаган тақдирда, Котибият томонидан қонун ҳужжатларини такомиллаштириш бўйича таклифлар ишлаб чиқилади ва Ўзбекистон Республикасининг Бош вазирига белгиланган тартибда кўриб чиқиш учун киритилади;
Котибият Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил билан биргаликда тадбиркорликни ривожлантиришга тўсқинлик қилаётган сабаблар ва шароитларни ҳудудлар ва соҳалар кесимида доимий равишда таҳлил қилади ва тизимлаштиради, Ўзбекистон Республикасининг Бош вазирига ишбилармонлик муҳитини яхшилаш бўйича ҳар чоракда аниқ таклифлар киритади.
6. Белгилансинки:
Тадбиркорлар мурожаатларини кўриб чиқиш қабулхоналаридатадбиркорларнингдавлат ва хўжалик бошқаруви органлари, назорат қилувчи ва ҳуқуқни муҳофаза қилувчи тузилмалар, шунингдек, бошқа ташкилотлар мансабдор шахсларинингҳаракати (ҳаракатсизлиги) юзасидан мурожаатлари кўриб чиқилади;
қарори ёки ҳаракати (ҳаракатсизлиги) устидан шикоят қилинаётган ташкилотларнинг мансабдор шахсларига мурожаатларни кўриб чиқиш учун асоссиз топшириш тақиқланади;
Тадбиркорлар мурожаатларини кўриб чиқиш қабулхоналари ўз фаолиятини Қорақалпоғистон Республикаси, вилоятлар, Тошкент шаҳри, туманлар ва шаҳарлардаги Тадбиркорликка кўмаклашиш марказлари, шунингдек, Ўзбекистон Республикаси Адлия вазирлиги ҳузуридаги Давлат хизматлари агентлиги ва унинг ҳудудий марказлари билан яқин ҳамкорликда амалга оширади;
Тадбиркорлар мурожаатларини кўриб чиқиш қабулхоналариҳудудларни комплекс ижтимоий-иқтисодий ривожлантириш секторлари (кейинги ўринларда – секторлар), давлат органлари ва бошқа ташкилотлар билан биргаликда тадбиркорлик субъектларининг муаммоларини аниқлайдилар ва уларнинг ҳал этилишини таъминлайдилар;
Қорақалпоғистон Республикаси, вилоятлар, Тошкент шаҳри, туманлар ва шаҳарлардаги Тадбиркорлар мурожаатларини кўриб чиқиш қабулхоналари секторлар ва ҳудудий ташкилотлар раҳбарларининг тадбиркорлар ҳуқуқлари ва қонуний манфаатларини таъминлаш бўйича фаолияти тўғрисидаги ахборотни ҳар чоракда тегишли халқ депутатлари Кенгаши мажлисларида муҳокама қилиш учун киритадилар, ушбу ахборот бўйича масъул ташкилотлар раҳбарларининг ҳисоботлари эшитилади.
7. Қуйидаги ҳисобот тизими амалиётга жорий этилсин, унга мувофиқ:
а) туманлар ва шаҳарлардаги Тадбиркорлар мурожаатларини кўриб чиқиш қабулхоналари ҳар ойнинг 5 санасигача Қорақалпоғистон Республикаси, вилоятлар, Тошкент шаҳридаги Тадбиркорлар мурожаатларини кўриб чиқиш қабулхоналарига амалга оширилган ишлар тўғрисидаги ҳисоботни ҳамда тадбиркорликни ривожлантиришга ва инвестицияларни жалб қилишга тўсқинлик қилаётган тизимли камчиликлар тўғрисидаги ахборотни киритадилар;
Қорақалпоғистон Республикаси, вилоятлар ва Тошкент шаҳридаги Тадбиркорлар мурожаатларини кўриб чиқиш қабулхоналари раҳбарлари ҳар ойнинг 7 санасигачаКотибиятга амалга оширилган ишлар тўғрисидаги йиғма-таҳлилий ахборотни ҳамда тадбиркорликни ривожлантиришга ва инвестицияларни жалб қилишга тўсқинлик қилаётган тизимли муаммоларни бартараф этиш бўйича асосланган таклифларни киритадилар;
Тадбиркорлар мурожаатларини кўриб чиқиш қабулхоналари фаолияти натижалари ҳар чоракда Ўзбекистон Республикаси Бош вазирининг раислигида алоҳида йиғилишларда, шу жумладан, видеоконференцалоқа орқали кўриб чиқилади;
б) Котибият Ўзбекистон Республикасининг Бош вазиригатадбиркорлардан, шу жумладан, чет эллик инвесторлардан Тадбиркорлар мурожаатларини кўриб чиқиш қабулхоналарига келиб тушган мурожаатларнинг кўрилиши жараёни ҳақида ҳар ҳафтада ахборот киритади;
в) Ўзбекистон Республикасининг Бош вазири ҳар чоракда Ўзбекистон Республикасининг Президентини:
Тадбиркорлар мурожаатларини кўриб чиқиш қабулхоналарининг иши натижалари, тадбиркорлар ҳамда уларнинг ҳуқуқлари ва қонуний манфаатларини ҳимоя қилиш, шунингдек, мамлакатда ишбилармонлик муҳитини яхшилаш юзасидан давлат органлари фаолиятидаги камчиликларни бартараф этиш бўйича кўрилаётган чора-тадбирлар ҳақида;
қабул қилинган қарорлар ёки мансабдор шахсларни рағбатлантириш ёхуд уларни тадбиркорлик субъектларининг, шу жумладан, чет эллик инвесторларнинг мурожаатларини юзаки кўриб чиққанлиги ёки кўриб чиқишдаги ҳаракатсизлиги учун шахсий жавобгарликка тортиш бўйича таклифлар тўғрисида хабардор қилади.
8. Қуйидагиларга:
адлия вазири Р.Давлетовга – Давлат хизматлари агентлиги бўлинмаларининг Тадбиркорлар мурожаатларини кўриб чиқиш қабулхоналари билан самарали ўзаро ҳамкорлиги, қонун ҳужжатларидаги бўшлиқлар ва камчиликларни ҳал этиш бўйича норматив-ҳуқуқий ҳужжатлар лойиҳаларининг ўз вақтида ва сифатли ишлаб чиқилиши, тадбиркорлик фаолияти эркинлиги кафолатлари таъминланиши бўйича чоралар кўрилиши учун;
Савдо-саноат палатаси раиси А.Икромовга – Тадбиркорлар мурожаатларини кўриб чиқиш қабулхоналари томонидан тадбиркорларнинг қабул қилинишини ташкил этишда ёрдам бериш, ҳудудлар ва бошқарув органлари кесимида тадбиркорликни ривожлантиришга тўсқинлик қилаётган тизимли муаммоларни аниқлаш, қонун ҳужжатларини такомиллаштириш бўйича таклифлар ишлаб чиқилиши учун;
Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил Д.Қосимовга –Тадбиркорлар мурожаатларини кўриб чиқиш қабулхоналарига мурожаат қилган тадбиркорларга ёрдам бериш бўйича амалий чоралар кўрилиши ҳамда уларнинг ҳуқуқлари ва қонуний манфаатлари бузилганлиги учун назорат қилувчи ва бошқа органларнинг айбдор мансабдор шахсларининг жавобгарликка тортилиши учун;
инвестициялар ва ташқи савдо вазири С.Умурзоқовга – Тадбиркорлар мурожаатларини кўриб чиқиш қабулхоналарига чет эл инвестицияларини жалб қилиш ва улар иштирокидаги лойиҳаларни амалга ошириш билан боғлиқ муаммоларни ҳал этишда, шунингдек, ташқи савдо фаолиятини амалга ошириш ва ишлаб чиқарилаётган маҳсулотларнинг ташқи бозорларга киришига кўмаклашиш учун;
Ҳисоб палатаси раисига – Тадбиркорлар мурожаатларини кўриб чиқиш қабулхоналарига келиб тушган тадбиркорлар мурожаатларининг ваколатли органлар томонидан ўз вақтида кўриб чиқилишини назорат қилиш, уларнинг мурожаатлари бўйича кўрилаётган чора-тадбирлар сифати ва Вазирлар Маҳкамасига айбдор мансабдор шахсларни белгиланган тартибда жавобгарликка тортиш бўйича таклифлар киритилиши учун;
вазирликлар, идоралар, маҳаллий ижро этувчи ҳокимият органлари раҳбарларига – Тадбиркорлар мурожаатларини кўриб чиқиш қабулхоналари билан самарали ўзаро ҳамкорлик қилиниши, тадбиркорлар муаммоларининг холисона ва адолатли ҳал этилиши, мурожаатларни кўриб чиқиш натижалари тўғрисида тегишли Тадбиркорлар мурожаатларини кўриб чиқиш қабулхоналарига, шу жумладан, “business.gov.uz” ягона интерактив порталидан фойдаланган ҳолда хабар берилиши учун шахсий масъулият юклансин.
9. Белгилаб қўйилсинки:
Тадбиркорлар мурожаатларини кўриб чиқиш қабулхоналарининг штат бирлиги тегишли Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари аппаратларининг, Ўзбекистон Республикаси Иқтисодиёт ва саноат вазирлиги, Давлат солиқ қўмитаси ва Адлия вазирлиги ҳузуридаги Давлат хизматлари агентлиги ҳудудий бўлинмаларининг штат бирликларини 5-иловага мувофиқ қисқартириш ҳисобига шакллантирилади;
Қорақалпоғистон Республикаси, вилоятлар ва Тошкент шаҳридаги, шунингдек, туманлар ва шаҳарлардаги Тадбиркорлар мурожаатларини кўриб чиқиш қабулхоналари ходимларининг Ягона тариф сеткаси бўйича разрядлари ва улар меҳнатига ҳақ тўлаш фонди таркиби 6 ва 6а-иловаларга мувофиқ белгиланади;
Қорақалпоғистон Республикаси, вилоятлар ва Тошкент шаҳридаги, шунингдек, туманлар ва шаҳарлардаги Тадбиркорлар мурожаатларини кўриб чиқиш қабулхоналари ходимларига илгари ишлаган жойида кўп йиллик меҳнати учун берилган устамалар ва қўшимча ҳақ, ҳарбий (махсус) унвонлар ва мартаба даражалари сақланиб қолади;
Тадбиркорлар мурожаатларини кўриб чиқиш қабулхоналарининг бошқарув ходимлари Ўзбекистон Республикаси Вазирлар Маҳкамасининг тегишли қарори билан белгиланган тартибда лавозимга тайинланадилар ва лавозимдан озод қилинадилар.
10. Ўзбекистон Республикаси Адлия вазирлиги Қорақалпоғистон Республикаси, вилоятлар ва Тошкент шаҳридаги, туманлар ва шаҳарлардаги Тадбиркорлар мурожаатларини кўриб чиқиш қабулхоналарини тегишли давлат хизматлари марказлари биноларида жойлаштириш юзасидан бир ҳафта муддатда Ўзбекистон Республикасининг Бош вазирига кўриб чиқиш учун таклифлар киритсин.
11. Ўзбекистон Республикаси Адлия вазирлиги ҳузуридаги Давлат хизматлари агентлиги Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари билан биргаликда Қорақалпоғистон Республикаси, вилоятлар ва Тошкент шаҳридаги, туманлар ва шаҳарлардаги Тадбиркорлар мурожаатларини кўриб чиқиш қабулхоналарини зарур мебель ва анжомлар, ахборот-коммуникация воситалари (компьютер, принтер, нусха кўчириш аппарати, интернет), алоқа воситалари (телефон, факс) билан жиҳозлаш юзасидан ўн кунлик муддатда Ўзбекистон Республикасининг Бош вазирига кўриб чиқиш учун асосланган таклифлар киритсин.
Ўзбекистон Республикаси Молия вазирлиги:
Тадбиркорлар мурожаатларини кўриб чиқиш қабулхоналарини молиялаштириш, шу жумладан, улар ходимлари меҳнатига ҳақ тўлаш, моддий-техника таъминоти ва уларнинг фаолияти билан боғлиқ бошқа харажатларни қоплаш учун Ўзбекистон Республикаси Давлат бюджети маблағлари ҳисобидан зарур маблағлар;
Қорақалпоғистон Республикаси, вилоятлар ва Тошкент шаҳридаги Тадбиркорлар мурожаатларини кўриб чиқиш қабулхоналари учун 14 та автотранспорт воситасини сақлаш учун лимит ажратсин.
12. Ўзбекистон Республикаси Ахборот технологиялари ва коммуникацияларини ривожлантириш вазирлиги манфаатдор вазирликлар ва идоралар билан биргаликда бир ой муддатда“business.gov.uz” ягона интерактив порталини ишлаб чиқсин ва ишга туширсин, унда қуйидаги асосий имкониятларнинг мавжуд бўлиши назарда тутилсин:
тадбиркорлар томонидан ҳудудлар, давлат ва хўжалик бошқаруви органлари ҳамда бошқа параметрлар кесимида муаммо келиб чиққан аниқ бизнес-жараённи акс эттирувчи мурожаат қилиниши;
ариза берувчи томонидан ўзининг шахсий кабинети орқали мурожаатнинг кўриб чиқилиши жараёнини реал вақт режимида кузатиб борилиши;
қулай ишбилармонлик муҳитини шакллантиришга тўсқинлик қилаётган тизимли муаммоларни автоматик режимда аниқлаш имконини берувчи тадбиркорлар мурожаатларининг тизимлаштирилган ягона маълумотлар базаси яратилиши.
13. Вазирлар Маҳкамаси икки ҳафта муддатда:
Ўзбекистон Республикаси Бош вазирининг Тадбиркорлар мурожаатларини кўриб чиқиш қабулхоналари фаолиятини ташкил этиш ва мувофиқлаштириш котибияти тўғрисидаги низомни;
Қорақалпоғистон Республикаси, вилоятлар ва Тошкент шаҳридаги Ўзбекистон Республикаси Бош вазирининг Тадбиркорлар мурожаатларини кўриб чиқиш қабулхоналари тўғрисидаги низомни;
туманлар ва шаҳарлардаги Ўзбекистон Республикаси Бош вазирининг Тадбиркорлар мурожаатларини кўриб чиқиш қабулхоналари тўғрисидаги низомни тасдиқласин.
14. Ўзбекистон Республикаси Бош вазирининг биринчи ўринбосари – А.Ж.Раматов Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил Д.С.Қосимов, Адлия вазирлиги (Р.К.Давлетов), Давлат солиқ қўмитаси (Б.А.Мусаев), Савдо-саноат палатаси (А.И.Икромов) ҳамда Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари билан биргаликда ўн кун муддатда Тадбиркорлар мурожаатларини кўриб чиқиш қабулхоналарини уларга юкланган вазифаларни юксак профессионал даражада ҳал этилишини таъминлашга қодир бўлган юқори малакали мутахассислар билан таъминлашга доир таклифларни Вазирлар Маҳкамасига кўриб чиқиш учун киритсин.
15. Ўзбекистон Республикаси Адлия вазирлиги манфаатдор вазирлик ва идоралар билан биргаликда қонун ҳужжатларига ушбу Фармондан келиб чиқадиган ўзгартириш ва қўшимчалар тўғрисида икки ой муддатда Вазирлар Маҳкамасига таклифлар киритсин.
16. Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги, Ўзбекистон Миллий ахборот агентлиги ва Ўзбекистон Миллий телерадиокомпанияси оммавий ахборот воситаларида Тадбиркорлар мурожаатларини кўриб чиқиш қабулхоналарининг мақсад ва вазифаларини, шунингдек, уларнинг фаолият натижаларини ёритиш юзасидан мақолалар, мавзули кўрсатув ва эшиттиришлар ташкил этсинлар.
“Uzbekistan Airports” АЖ Тадбиркорлар мурожаатларини кўриб чиқиш қабулхоналари тўғрисидаги ахборот баннерларини аэропортларнинг терминалларида жойлаштирилишини таъминласин.
17. Ўзбекистон Республикасининг Бош вазири А.Н.Арипов ушбу Фармонда белгиланган талаблар ва вазифаларни ўз вақтида амалга ошириш юзасидан аниқ чора-тадбирлар комплекси – “Йўл харитаси”ни бир ҳафта муддатда ишлаб чиқсин ва тасдиқласин.
18. Мазкур Фармоннинг ижросини назорат қилиш Ўзбекистон Республикасининг Бош вазири А.Н.Арипов ва Ўзбекистон Республикаси Президенти Администрацияси раҳбари З.Ш.Низомиддинов зиммасига юклансин.
Ўзбекистон Республикаси
Президенти Ш.МИРЗИЁЕВ
Тошкент шаҳри,
2019 йил 14 май
...
Ўзбекистон Республикаси Президенти Шавкат Мирзиёев 14 май куни қурилиш материаллари ишлаб чиқариш саноатини янада ривожлантириш бўйича устувор вазифаларга бағишланган йиғилиш ўтказди.
Кейинги йилларда мамлакатимизда бунёдкорлик кўлами янада кенгайиб, юзлаб уй-жойлар, йирик саноат корхоналари, маданият ва спорт масканлари, йўлу кўприклар барпо этилди.
Рақамлар билан айтганда, кейинги икки йилда қурилиш ишлари ҳажми 1,7 баробар ошган. Уларда асосан юртимизда ишлаб чиқарилган материаллардан фойдаланилган. Шу билан бирга, керамик ва ёғоч-қипиқ плиталар, ойна, гулқоғоз ва бошқа материаллар импорт қилиб келинмоқда. Аслида, Ўзбекистонда замонавий қурилиш материаллари ишлаб чиқариш ҳажмини янада ошириш, импорт ўрнини қоплаш учун катта имкониятлар мавжуд.
– Мамлакатимизда бунёдкорлик ишлари тобора ортиб бораётган бугунги кунда қурилиш материаллари иқтисодиётнинг етакчи тармоғига, ўсиш нуқталаридан бирига айланиши керак. Корхоналарда энергия самарадор технологияларни жорий этиш орқали табиий бойликларимизни тежаш, материаллар нархини тушириш мумкин, – деди Шавкат Мирзиёев.
Давлатимиз раҳбари қурилиш материаллари соҳасида ишлаб чиқаришни келгуси беш йилда камида икки баробар ошириш бўйича долзарб вазифаларни белгилаб берди.
Норуда конлар захираларини ошириш, саноат усулида қайта ишлашни кенгайтириб, қурилиш материаллари соҳасини диверсификация қилиш зарурлиги таъкидланди.
Президентимиз соҳа корхоналарини барқарор ва камхарж энергия билан таъминлаш масаласига алоҳида эътибор қаратди. Кўмир ишлатиладиган биргина ғишт заводи мисолида маҳсулот нархини 50 фоизгача тушириш мумкинлигини кўрсатиб ўтди. Шу каби замонавий технологияларни қўллаш катта миқдорда табиий газни тежаш, маҳсулотларни арзонлаштиришга хизмат қилиши таъкидланди. Бу ҳам тадбиркорга, ҳам халққа, ҳам давлатга фойда келтиради.
Шу боис қурилиш материаллари тармоғида энергия тежайдиган технологияларни жорий этиш орқали таннархни камайтириш бўйича топшириқлар берилди.
Мамлакатимиз қурилиш материаллари саноатининг экспорт салоҳияти ҳам юқори. Лекин автотранспорт харажатларининг кўплиги уларнинг нархига таъсир кўрсатмоқда. Шу боис экспорт товарларини ташиш харажатларини субсидиялаш таклифи билдирилди.
Жорий йилда Қорақалпоғистон Республикаси, Сурхондарё, Андижон ва Навоий вилоятларида ҳар бири 2 миллион тонна қувватга эга 4 та цемент корхонаси ишга туширилди.
Йил якунигача 3,5 миллион тонна қувватли янги заводлар фойдаланишга топширилиб, йиллик салоҳият 15 миллион тоннага етказилади. Бу цементга бўлган ички талабни таъминлаб, нархини арзонлаштириш имконини бериши қайд этилди.
2019-2020 йилларда соҳада 17 триллион сўмлик мингдан зиёд лойиҳани амалга ошириш режалаштирилган. Ушбу лойиҳалар учун тижорат банклари кредитини ажратиш ва хорижий инвестицияларни фаол жалб қилиш бўйича кўрсатмалар берилди. Шунингдек, паст рентабелли корхоналарни салоҳиятли инвесторларга сотиш масаласи ҳам кўриб чиқилди.
Қурилиш материаллари саноатини янада ривожлантириш учун тажрибали мутахассислар керак. Лекин олий ўқув юртларидаги мавжуд ўринлар ишлаб чиқаришда ўсиб бораётган талабга мос эмас. Таълим жараёни амалиёт билан боғланмаган.
Шу боис йиғилишда соҳа ихтисосликларига бюджет квотасини ошириш, корхоналарда ўқув амалиётини ташкил этишни такомиллаштириш, хорижий компаниялар билан ҳамкорликда янги технологиялар бўйича малака ошириш марказларини ташкил этиш бўйича кўрсатмалар берилди.
Йиғилишда муҳокама қилинган масалалар бўйича мутасаддилар ҳисобот берди.
Манба: Ўзбекистон Республикаси Президенти
Матбуот хизмати
...
Мамлакатимиз Президенти Шавкат Мирзиёевнинг вилоятимизга ташрифлари она юртимиз Фарғонанинг ҳар тамонлама ривожланиши ва юксалишига замин яратди. Халқимиз ибораси билан айтганда Юртбошимизнинг ташрифи файз ва баракани олиб келди.
Барчамизга яхши маълумки, инсон саломатлигидан азизроқ ва қадрлироқ неъмат йўқ. Зеро, ҳар томонлама соғлом ва баркамол инсон жамиятнинг олтин заҳираси ҳисобланади.
Бугунги кунда мамлакатимиз Президенти ва ҳукуматимиз томонидан соғлиқни сақлаш тизимига жуда катта эътибор қаратилмоқда. Ҳар бир соҳада пешқадамликни қўлдан бермаган фарғоналиклар бу борада ҳам ислоҳотларнинг энг олдинги сафида бўлдилар. Фарғона шаҳрининг марказида Жанубий Корея мамлакати билан ҳамкорликда қуриб, ишга туширилган «Listem-Fergana» қўшма корхонаси юқоридаги фикримизнинг исботи бўлиши мумкин. Юртбошимизнинг мазкур қўшма корхонага ташрифлари меҳнат жамоасини янада руҳлантириб юборди. Жанубий Корея билан ҳамкорликда ташкил этилган мазкур қўшма корхонада рентген асбоб-ускуналари ишлаб чиқарилади. Бу нафақат юртимиз, балки минтақада юқори технологияли тиббий техника тайёрлайдиган ягона завод ҳисобланиши билан диққатга сазовордир. Корхона лойиҳасининг умумий қиймати 8 миллион доллар бўлиб, йилига икки турдаги 300 дона рентген аппарати ишлаб чиқаришга мўлжалланган. Биринчи босқич доирасида 35 киши иш билан таъминланган. Йил якунига қадар яна юзга яқин иш ўрни яратилиши кўзда тутилган. Давлатимиз раҳбари аҳоли саломатлигини мустаҳкамлашда тўғри ташхис қўйиш муҳимлигини, тиббий жиҳозларни юртимизда ишлаб чиқариш ҳам иқтисодий, ҳам ижтимоий жиҳатдан яхши натижа беришини алоҳида таъкидлаб, келгусида корхонада маҳаллийлаштириш даражасини ошириш, саноат кооперациясини ривожлантириш, ходимлар малакасини юксалтириш бўйича ўзларининг қимматли таклиф ва маслаҳатларини бердилар.
Шу билан биргаликда Президентимиз ўз ташрифлари чоғида кўп йиллик меҳнат ва ҳаёт тажрибасига эга бўлган нуронийларимизнинг жамиятимизда тутган ўрни ва обрўси хусусида, хотин-қизларнинг бандлигини таъминлаш орқали уларни фаровон ҳаётга бўлган қизиқиш ва салоҳиятларини янада кучайтириш, келажагимиз эгалари бўлган фарзандларимиз учун зарур бўлган барча шарт-шароитларни яратиш, у хоҳ янги иш ўрни хусусида бўлсин, хоҳ жиноятчиликни олдини олиш йўналишида бўлсин барча-барчасига биз депутатларни огоҳликка ва даҳлдорлик ҳисси билан фаолият олиб боришга чорладилар.
Шу билан биргаликда Президентимиз вилоятимиз фаоллари билан бўлиб ўтган йиғилишда вилоятимизда амалга оширилган амалий ишларни бирма-бир таҳлил қилдилар ва ҳали олдинда бажарилиши зарур бўлган вазифалар, ўз ечимини кутиб турган масалалар хусусида ҳам қимматли маслаҳатларини бериб ўтдилар.
Халқимиз эртага эмас, бугунги кунда яхши яшашга ҳақли эканлигини, шунинг учун кечаги кун билан яшаб бўлмаслигини уқтирдилар. Олдимизда турган қатор вазифаларни санаб ўтдилар, яъни саноатни, тадбиркорликни ривожлантириш орқали янги иш ўринлари яратилиши, бу эса ёшларимизни, аёлларимизни, айниқса чет давлатларга иш излаб чиқиб кетаётган фуқароларимизнинг ўз оиласи бағрига қайтиб келиши имкониятини яратиб бериши, ёшларимиз тарбияси эса асосий масала эканлиги, уларни маънавиятга, спортга, китобхонликка жалб қилиш масалалари кун тартибидаги энг долзарб муаммолар эканлигини таъкидлаб, вилоятда фавқулотда ҳолат эълон қилдилар.
Мазкур вазифаларни ҳаётга изчил тадбиқ этишда биз депутатлар доимо олдинги сафда бўлишлигимизни яна бирбор англадик. Бу ишда Президентимизнинг ўзлари бизга яққол намуна бўлаётганликлари алоҳида таҳсинга лойиқ.
Ташриф ва учрашувлар чоғида Юртбошимиз бошчилигида эзгу ишларни амалга ошираётган халқимизнинг эртанги куни порлоқлигига яна бир карра амин бўлиб, шукроналар келтирдим.
Манзурахон САЛИМОВА,
Халқ депутатлари
Фарғона вилоят Кенгаши депутати
Бизни ижтимоий тармоқларда ҳам кузатинг:
t.me/adolat_uz
instagram.com/adolat_sdp/
facebook.com/sdpu.adolat/
twitter.com/AdolatSDP
...
Мустақилликка эришилган дастлабки йиллардан республикамизда халқимиз маънавиятини юксалтиришга алоҳида эътибор қаратилаётгани бежиз эмас. Юксак маънавият ҳар қандай ички ва ташқи маънавий таҳдидларни енгади.
Давлатимиз раҳбарининг шу йил 3 майдаги “Маънавий-маърифий ишлар самарадорлигини ошириш бўйича қўшимча чора-тадбирлар тўғрисида”ги қарори бу борада яна бир дадил қадам бўлди. Мазкур хужжатда соҳада таъсирчанликни ошириш, мафкуравий иммунитетни мустаҳкамлаш борасида аниқ вазифалар белгилаб берилди. Маънавият ва маърифат Кенгашига оила, маҳалла, таълим муассасаси ва меҳнат жамоалариди ижтимоий-маънавий муҳитни ўрганиш баробарида соғломлаштиришга қаратилган фаолиятда иштирок этиш вазифаси юклатилди.
Қарор билан ибратли фаолияти учун давлат органлари ва ташкилотлар ходимлари учун “Маънивият фидойиси” кўкрак нишонининг таъсис этилиши ўринли таклиф. Бу ҳар биримизни фидойиликка, жамоатчиликни ўз ортимиздан эргаштиришга ундайди.
Албатта, биз халқ вакиллари бўлган маҳаллий кенгаш депутатлари зиммасига ҳам катта масъулият юклатилади. Жамоатчилик орасида, биринчи навбатда оилаларда маънавий муҳитни ўрганиб бориб, давлатимизнинг бугунги сиёсатининг асл мазмунини фуқароларга етказиш мақсадга мувофиқ. Бу борада Ўзбекистон “Адолат” СДПнинг қонун устуворлигига қаратилган лойиҳалари ижросини таъминлаш лозим. Фуқароларнинг ҳуқуқий маданиятини юксалтирииш орқали уларда ватанпарпарликни ошириш билан бирга қонунбузилиш ҳолатларининг олдини олишга эришилади.
Биз халқ депутатлари Асака туман кенгаши депутатлари юқоридаги қарордан келиб чиқиб, “Менинг юртим-менинг бахтим” шиори остида маҳаллаларда маънавий-маърифий тадбирлар ўтказшга қарор қилдик. Бу тадбирлар Ўзбекистонда амалга оширилаётган ислоҳотларни жамоатчиликка етказиш, она Ватан тушунчасини ёшлар онгига сингдириш ва эртанги кунга бўлган ишончини мустаҳкамлашга хизмат қилади.
Дилфуза СОБИРОВА,
Халқ депутатлари
Асака туман кенгаши депутати
Бизни ижтимоий тармоқларда ҳам кузатинг:
t.me/adolat_uz
instagram.com/adolat_sdp/
facebook.com/sdpu.adolat/
twitter.com/AdolatSDP
...
"Жуда бой, чиройли тилимиз бор. Бу тилда ифода этиб бўлмайдиган фикр, туйғу, ҳолат йўқ!". Ёзувчи Абдулла Қаҳҳорнинг ушбу сўзлари ҳар бир юрдошимизда ўзбек тилига бўлган ҳурмат-эҳтиромни янада юксалтиради. Мамлакатимизда ўзбек тилига давлат тили мақоми берилиши ҳам бежиз эмас, албатта. Тил нафақат муомала воситаси - балки халқнинг маданияти, урф-одати, унинг турмуш тарзи, тарихидир. Тил – ҳар бир миллат ўзлигининг ажралмас белгисидир.
Шу ўринда айтиш мумкинки, яқиндагина ижтимоий тармоқларда рус тилига расмий мақом бериш тўғрисидаги бир гуруҳ мурожаатчиларнинг таклифлари аксарият юртдошларимизнинг норозиликларига сабаб бўлди. Фарғона давлат университетида Ўзбекистон “Адолат” СДП Фарғона вилояти Кенгаши ҳамда халқ депутатлари вилоят Кенгаши депутатлик гуруҳи аъзолари, ўқитувчилар ва талабалар иштирокида ўтган очиқ мулоқотда айни мавзуда сўз борди. Унда миллийлигимизни асрашда тил муҳим восита эканлигини, ўзга тилларнинг унга аралашиши маънавиятимизга жиддий зарар этказиши таъкидлаб ўтилди.
Мухторали Зокиров, ФарДУ доценти;
— Юртимизда барча миллат ва элатларнинг тиллари, урф-одатлари ривожланиши учун имкониятлар яратилган. Оммавий ахборот воситалари ҳам турли тилларда юритилади. Мактабларда дарс машғулотлари турли тилларда олиб борилади. Шундоқ ҳам халқаро тил бўлган ва кўпгина юртдошларимиз яхши биладиган рус тилига давлат тили мақоми берилишига эса ҳеч қандай эҳтиёж йўқ. Бу ўзбек тилшунослигида жиддий муаммоларга олиб келади. Аксинча, биз ўзбек тили мавқеини янада оширишимиз, уни интернет тилига айлантиришимиз, дунёнинг турли давлатларида ўзбек тили марказларини ташкил этишимиз керак. Боиси жаҳонда 250 яқин мамлакат бор. Аммо 90 тадан зиёд тилгина давлат тили мақомига эга ва уларнинг ичида ўзбек тили ҳам бор. Ўзбек тили давлат тили мақомига эга эканлиги бизнинг бахтимиз. Ёшларимиз буни яхши тушунишлари, билишлари керак.
Чиндан ҳам, тил - миллат кўзгуси. Шу маънода она тилига бўлган ҳурмат-эҳтиром айни пайтда инсоннинг ўз қадрини ҳам юксалтиради. Бундайларни ватанпаравар, миллий анъана ва қадриятларга садоқатли шахс сафатида баҳолайдилар. Ўтказилаётган тадбирлар мазмун-моҳияти ҳам тилнинг софлигини асраш, ёшларда кучли фуқаролик позицияси, давлат тили, расмий тил тушунчаларига тўғри муносабатни шакллантириш, уларнинг ҳуқуқий билимларини мустаҳамлаш каби эзгу мақсадларга қаратилганлиги билан аҳамиятлидир.
Нурбек МИРЗАЕВ,
Ўзбекистон “Адолат” СДП
Фарғона вилоят Кенгаши
матбуот котиби
Бизни ижтимоий тармоқларда ҳам кузатинг:
t.me/adolat_uz
instagram.com/adolat_sdp/
facebook.com/sdpu.adolat/
twitter.com/AdolatSDP
...
Май ойи ижтимоий тармоқларда тил масаласига доир қизғин мунозара билан ёдда қоладиганга ўхшайди. Бунга бир гуруҳ “ўзбек зиёлилари”нинг Ўзбекистонда рус тилига расмий мақом бериш ҳақидаги таклифи ўрин олган мурожаати сабаб бўлди. Ушбу материал “Вести.уз” сайтида эълон қилинган ва қатор интернет-нашрлар томонидан кўчириб босилган. Ўтган қисқа муддат ичида бу мавзуда жуда кўп муносабат билдирилди. Уларнинг аксариятида жўяли фикрлар мавжуд. Менга айниқса, таниқли олим Зуҳриддин Исомиддиновнинг мулоҳазалари маъқул тушди.
Чиндан-да, биринчи навбатда “Давлат тили тўғрисида”ги қонунни қайта кўриб чиқиш ва талаб даражасига келтириш керак. Бундай юксак мақомдаги ҳужжатнинг “тиш-тирноқсиз” эканлигига асло тоқат қилиш мумкин эмас. Ўзингиз ўйлаб кўринг, юқоридаги қонун бузилаётганлигига деярли ҳар куни гувоҳмиз. Лекин қарийб ўттиз йил давомида бирон-бир жисмоний ёки юридик шахс давлат тилига путур етказганлиги учун қандайдир жавобгарликка тортилганлигини ҳеч ким эслай олмайди. Ҳар йили 21 октябрь арафасида матбуотда, радио ва телевидениеда мазкур санага бағишланган чиқишлар қилиб, қонунни олқишлайвериш билан иш битмайди-ку. Бу эса назаримизда, қонуннинг умуман ишламаётганлигидан далолатдир.
Қани, бизнинг Расул Ҳамзатовларимиз? Ажойиб авар шоири ўзининг сон жиҳатидан унча катта бўлмаган халқи тилини нақадар жонкуярлик билан ҳимоя қилганлиги барчага маълум. Унинг онага, тилга, бебаҳо қадриятларга эҳтиромни юксак даражага кўтаргани ибрат эмасми? Расул оғанинг она тилига бағишланган машҳур шеъридаги мана бу мисралар ҳар биримизга сабоқ бўлиши зарур.
Авар сўзин тинглаб кирди менга жон,
Оҳиста тирилдим ва шунда билдим:
Мени тузатолмас ҳеч дори-дармон,
Жонимга масихдир шу она тилим.
Майли, ким қай тилдан завку шавқ олса,
Менинг ўз тилимга минг жоним фидо.
Эрта она тилим агар йўқолса,
Мен бугун ўлишга бўлурман ризо.
“Ўзбек зиёлилари”нинг мурожаати бир неча жиҳатдан кишини ўйлантиради. Энг аввало, рус тили уларнинг шундай таклифига муҳтожми, деган савол туғилади. Унинг мамлакатимиздаги ҳозирги мавқеи ёмон эмас. Мактабгача таълим муассасаларидан тортиб олий ўқув юртларигача бу тилда ўқиш учун шарт-шароитлар яратилган. Газета-журналлар, адабиётлар чоп этилади, радио-телевидениеда эшиттириш ва кўрсатувлар эфирга узатилади, интернет-ресурслар ҳам керагича бор.
Жаҳон миқёсида фикрласак, айни пайтда дунёда 260 миллиондан зиёд киши русча сўзлашади. Пушкин ва Толстой тили БМТ ва ЮНЕСКО, бошқа кўплаб халқаро ташкилотларнинг расмий тили ҳисобланади. Ўзининг тарқалиши ва қўлланиши миқёси жиҳатидан ер юзида олтинчи ўринда туради.
Шундай экан, биринчи навбатда давлат тилининг ўз мақомига мос ҳолатга келтириш тўғрисида ғамхўрлик қилиш мақсадга мувофиқ эмасми? Бунга биз журналистлар ҳам ҳисса қўшишимиз даркор, албатта. Радио ва телевидениеда сўзга чиқадиган кишилар, ҳатто мухбирлар ҳам шевада сўзлашдан қутула олганликларича йўқ. Кинода ҳам шу аҳвол. Наҳотки, адабий тил миллатни бирлаштириши лозим бўлган омиллардан бири эканлигини ҳеч ким тушунмаса?
Тилларни ўрганиш ҳақида гап кетганда, аввало, ҳар бир фуқаромиз ўзбек тилини пухта ва беками-кўст билиши асосий қоидага айланиши керак. Бунинг учун таълим муассасалари ходимларига кўп нарса боғлиқ. Яна бир қизиқ жиҳат шундаки, беш ёки олти ёшдаги бола ҳали она тилини тўла ўзлаштирмай туриб, инглиз ёки рус тилида шеър айтганлиги билан мақтанамиз. Хорижда ўзбекчани ўрганишни кенгайтириш ва рағбатлантириш масаласи эса ҳеч кимнинг хаёлига келмайди.
Таълим мавзусига қайтсак, боғча ва мактабларда болалар гуруҳ ва синфларда икки ёки учга бўлиб чет тилига ўргатилади. Ҳақли савол туғтлади: нега ўзбек тилига нисбатан ўзгача муносабатда бўлинади? Дарвоқе, собиқ тузум пайтида шундай эди, ҳозир ҳам ҳеч нарса ўзгармаган. Айни вақтда хорижий тилларни ўргатадиган ўқув марказлари урчиб кетди. Улар нафақат шаҳарларда, балки қишлоқларда ҳам фаолият кўрсатмоқда. Фарзандингизни алоҳида шуғуллантираман десангиз, репетиторлар ҳам етарли, ҳақини тўласангиз кифоя. Бу, нафақат хорижий тилларга, балки бошқа фанларгаам тааллуқли эканлигидан кўз юмиб бўлмайди. Балки мактабларда таълим савияси ва самарадорлиги пастлигидан шундай бўлаётгандир. Бу ҳам муҳокама учун бир мавзу.
Давлат тилининг ростмана мавқега эга бўлолмаётганига ёзув масаласининг узил-кесил ҳал этилмаганлиги ҳам сабаб. Лотинчага ўтишга қарор қилинди-ю жуда кўп муаммолар келиб чиқди. Мисол учун, ҳозиргача имло қоидалари мукаммаллаштирилгани йўқ. Алифбони такомиллаштириш масаласи ҳам кун тартибидан олиб ташланмаган. Шунга қарамай уни таълим жараёнида тўла қўлланилмоқда. Балки яна кирил ёзуви ҳақида ўйлаб кўриш керакмикан?
Бундан ташқари, олий таълим муассасаларида ҳам талабаларнинг ўзбек тилини чуқур ва пухта эгаллашлари учун шарт-шароит яратиш зарурга ўхшайди. Яқинда Наманган давлат университети ўзбек тили ва адабиёти кафедраси катта ўқитувчиси, филология фанлари номзоди Шавкаидон Абдураҳмонов билан суҳбатлашиб қолдик. У ҳам ижтимоий тармоқлардаги муҳокамаларга бефарқ эмаслигини айтди. Айни пайтда университетда ўзбек тилини кенгроқ ўқитиш тарафдори эканлигини баён этди. Масалан, “Давлат тилида иш юритиш”, “Нутқ маданияти” каби фанларни жорий этиш фойдадан холи бўлмаслиги тўғрисидаги мулоҳазаларга биз ҳам қўшилдик. Бироқ ҳозирча ўзбек филологиясидан ташқари биронта факультетда она тилимиз ўқитилмас экан. Таълим рус тилида олиб бориладиган йўналишларнинг биринчи босқичларигина бундан мустасно. Нега кейинги босқичларда ўқитилмайди? Ёки ёшларнинг тил бўйича юқори малакали мутахассис бўлишидан чўчиймизми?
Лекин энг даҳшатли ҳолат шундаки, бугунги жамиятимизда Навоий ва Машраб забонининг ҳақиқий жонкуярлари жуда оз. Айниқса, катта-курсиларни эгаллаб ўтирган раҳбарлар орасида. Аслида уларни ҳам лавозимга давлат тилини билишига ва унга муносабатига қараб қўйиш керакмикан? Шу фикрга изоҳ сифатида шу йил январь ойида “Халқ сўзи” газетасида ва сайтида босилган бир луқмани мисол келтираман.
“Мамлакатимизда “Давлат тили ҳақида”ги Қонун қабул қилинганига яқинда ўттиз йил тўлади. Ўтган давр мобайнида мазкур ҳужжат асосида қатор ишлар амалга оширилди. Аммо шу билан бирга, бу соҳада ҳали камчиликлар етарли эканлигини ҳеч ким инкор этолмайди. Қонун ижроси юзасидан изчил назорат йўқлиги кўзга яққол ташланмоқда. Наманган шаҳри кўчаларини айлансангиз, бунга яна бир карра ишонч ҳосил қиласиз.
Айниқса, савдо ва хизмат кўрсатиш шохобчалари атрофидаги эълон, афиша ҳамда реклама панноларида ёзилган матнларни ўқисангиз, кўплаб имловий ва стилистик хатолар, хорижий сўзлардан ноўрин фойдаланиш каби ҳолатларга кўзингиз тушади. Мана, ошхона олдидаги ёзув: “ZAKAZ SHASHLIK”. Бу ўқловдай ҳарфлар уни тайёрлаганларнинг савод даражасидан далолат бериб турибди.
“Чуст БУЮРУТМА ТАОМЛАРИ” ва “НАХОРГА МАСТАВА” жумлаларидаги хатолар ҳам, ҳеч сўзсиз, пешонангизни тириштиради. “ТИЛЛО ДОДА ПАТИР НОН МАРКАЗИ”нинг “ижодкорлари” нима демоқчи эканликларини ўзлари тушунармикинлар?
“На дизайн, на бадиий дид талабларига жавоб берадиган йўл кўрсаткичларига мутасаддилар эътибор қаратганмиканлар?” деган савол ҳам туғилади. Наҳотки “A. Temur” ўрнига “Amir Temur”, “Boburshox ko’chasi” ўрнига “Bobur shoh ko‘chasi”, “Hamrox” ўрнига “Hamroh” деб ёзиш кераклигини ҳеч ким англаб етмаган бўлса? Ачинарлиси, давлат тилига бундай эътиборсизлик, бу каби муносабатни, чаласаводлик кўринишларини деярли ҳар қадамда учратиш мумкин.
— Биз бир неча йилдан бери шаҳар ва туман ҳокимликлари ҳузурида ташқи реклама воситаларининг мазмун-мундарижасини назорат қиладиган комиссия тузилиши зарурлиги ҳақидаги масалани кўтариб келамиз, — дейди “Тасвирий ойина” ижодий уюшмаси бўлими раҳбари Дилшод Мамажонов. — Афсуски, ҳозиргача бу таклиф инобатга олингани йўқ. Оқибатда “Давлат тили ҳақида”ги Қонун талабларининг бузилишига йўл қўйилмоқда.”
Энг қизиғи, ушбу материалда келтирилган ҳолатларга барҳам беришга ҳозиргача на вилоят, на шаҳар ҳокимлигидаги мутасаддилар, на жамоатчилик вакиллари эътибор қаратдилар. Шундай давом этаверсак, ўтган даврда эришилган натижалардан маҳрум бўлиб қолишимиз, “Давлат тили тўғрисида”ги қонун қуруқ қоғозга айланиши ҳам ҳеч гап эмас.
Нурбек АБДУЛЛАЕВ,
Ўзбекистон “Адолат” СДП
Наманган вилоят Кенгаши матбуот котиби
Бизни ижтимоий тармоқларда ҳам кузатинг:
t.me/adolat_uz
instagram.com/adolat_sdp/
facebook.com/sdpu.adolat/
twitter.com/AdolatSDP
...
Мана бир неча йиллардан бери, юртимизда 9 май – Хотира ва қадрлаш куни сифатида кенг нишонланиб келинаяпти. Ушбу улуғ айём туфайли аждодларимиз руҳини хотирлаш, уларга эҳтиром кўрсатиш, шунингдек, ёш авлоднинг ҳар томонлама баркамол бўлиб вояга етишида ўзининг улкан ҳаётий тажрибаси орқали ибрат бўлаётган кексаларимиз ҳурматини жойига қўйишдек эзгу фазилатлар ҳар бир юртдошимизнинг қалб амрига айланди, давлатимиз сиёсатининг устувор йўналиши сифатида қарор топди.
Қолаверса, ушбу байрам ўсиб келаётган ёш авлод учун ҳам жуда катта аҳамиятга эга. Чунки, мард, жасур, Ватан учун жон фидо қилган ютдошларимизни улуғлаш, уларнинг хотирасини ёд этиш орқали ёшларни истиқлол ғояларига садоқат, она халқига чексиз муҳаббат руҳида тарбиялашда муҳим омил бўлади.
Президентимиз Шавкат Мирзиёев Хотира ва қадрлаш кунига бағишланган тантанали маросимда сўзлаган нутқида орадан қанча йиллар, замонлар ўтмасин, буюк ғалабанинг қадр-қиммати ва аҳамияти тобора ортиб бораверишини алоҳида таъкидлади. Ҳақиқатан ҳам, урушни кўрган, унинг машаққатларини бошдан кечирган инсонларнинг барчаси тинчлик – бебаҳо неъмат эканлигини, уни асраб-авайлашимиз лозимлигини бизга бот-бот уқтирмоқдалар. Дарҳақиқат, истиқлолимизнинг ўтган йиллари мобайнида мамлакатимизда амалга оширилаётган ислоҳотлар замирида халқимизнинг тинч ва осуда ҳаётини таъминлаш, турмуш даражасини юксалтиришдек олижаноб мақсад мужассамдир.
Мамлакатимиз раҳбари ўз нутқида нафақат фронтда жон берган, Ватан озодлиги учун курашган мард ва жасур ўзбек аскарларнинг қаҳрамонлиги-ю мардлиги тўғрисида, балки фронт ортида бир бурда нонни ҳам ўзига раво кўрмай фронтга юборган, бутун шижоати билан кеча-ю кундуз тинимсиз меҳнат қилган ўзбек халқининг мислсиз матонатига ҳам алоҳида тўхталиб ўтди.
Ўзбекистон ўша суронли йилларда фронт учун икки мингдан зиёд самолёт, кўплаб қурол-яроғлар, ҳарбий-санитария поездлари, юзлаб дала ошхоналари, палаткалар, улкан миқдорда озиқ-овқат, кийим-кечак ва бошқа маҳсулотлар етказиб берди. Уруш гирдобида қолган ҳудудлардан Ўзбекистонга эвакуация қилинган бир миллионга яқин инсонга, шу жумладан, ики юз мингдан ошиқ ёш болаларга халқимиз бошпана бериб, меҳр-мурувват кўрсатди.
“Албатта, бу рақамлар – шунчаки статистик маълумотлар эмас. Бу рақамлар бошимиздан кечирган мудҳиш уруш оқибатларини ҳеч қачон унутмасликка чақиради. Шу билан бирга, бугунги тинч ва гўзал ҳаётнинг қадрига етиб, доимо ҳушёр ва огоҳ бўлишга, ёшларни Ватанга садоқат руҳида тарбиялашга хизмат қилади” – дея алоҳида таъкидлади мамлакатимиз раҳбари.
Шу ўринда бир муҳим вазифага алоҳида эътибор қаратишимиз керакки, бу ҳам бўлса ҳозирги дориломон кунларнинг қадрига етиш, юртимиз тинчлигини кўз қорачиғидек асрашдир. Айниқса, ўта шиддат билан ўзгариб бораётган, таҳдид ва таҳликаларга тўла бўлган ҳозирги даврда Ватанимиз осойишталигини асраш, узоқ ва яқиндаги давлатлар билан конструктив ҳамкорликни янада чуқурлаштириш барчамизнинг муҳим вазифамиз ҳисобланади. Шу билан бирга ёшларимизни нафақат ҳақиқий ватанпарвар инсонлар қилиб тарбиялаш ҳам ҳар биримизнинг зиммамизга улкан масъулият юклайди!
Хулоса қилиб айтганда, Ватан — улуғ, ота-боболаримизнинг муборак ҳоклари ётган табаррук замин, бир умр севиб, ардоқлаб, кўзимизга тўтиё қилиб яшайдиган муқаддас саждагоҳимиз, дунёда ҳеч нарсага алмаштириб бўлмайдиган буюк ва бебаҳо хазинамиздир. У борки, ор-номусимиз, қадр-қимматимиз юксак, ғурур ва ифтихоримиз, иймон-эътиқодимиз мустаҳкам ва барқарордир. Шундай экан, ана шу табаррук замин, мусаффо осмон, эркин ва осуда ҳаётни ҳимоя қилиш, кўз қорачиғидек асраб-авайлаш — ҳар биримизнинг шарафли бурчимиздир.
Қодир ЖЎРАЕВ,
Олий Мажлис Қонунчилик палатаси депутати,
Ўзбекистон “Адолат” СДП фракцияси аъзоси
Бизни ижтимоий тармоқларда ҳам кузатинг:
t.me/adolat_uz
instagram.com/adolat_sdp/
facebook.com/sdpu.adolat/
twitter.com/AdolatSDP
...
Сўнгги кунларда интернет тармоқларида давлат тили масаласида айтилаётган фикр-мулоҳазалар зиёли инсонларни бефарқ қолдирмаса керак.
Мамлакатимиз ўз мустақиллигини қўлга киритиб, ўзлигимизни англаш бахтига муяссар бўлдик. Боболаримиз яратган буюк хазиналардан эмин-эркин фойдаланиш, ўрганиш имконияти бизни жаҳонаро юксак маънавият эгалари эканлигимизни кўрсатмоқда.
Ўзбек тилининг давлат тили мақомига эришиши унинг янада ривожланиши учун берилган кенг имкониятлардан бири бўлди.
Бир гуруҳ шахсларнинг рус тилига расмий тил мақомини бериш ҳақидаги таклифи юртимизда зиёлилар эътирозига сабаб бўлганлиги бежиз эмас.
Шуни айтиш лозимки, мамлакатимиз кўп миллатли бўлганлиги учун умумтаълим мактабларида ўқув 7 та тилда олиб борилаётганининг ўзиёқ халқимиз бағрикенглигининг ёрқин намунаси саналади.
Юртимизда хорижий тилларни ўрганишга ҳеч қандай тўсиқлар йўқ. Нафақат ёшлар, балки барча фуқароларимиз, айниқса, халқаро тилларни билишга интилмоқда, ўрганмоқда.
Бошқача айтганда, миллий тилимизни асраб, бошқасини ўрганиб, энг асосийси, ҳурмат қилиб яшаётган халқмиз. Аммо миллий маънавиятимизга хос бу фазилатлар, ҳурмат ва эътиборимиз ўша тиллардан бирига давлат тили мақомини бериш истагини англатмайди, албатта. Миллий тил инсоннинг ўз онаси мисоли. Бошқаларнинг ота-онасига эҳтиром кўрсатиш уларни ўз ота-онангга тенглаш бўлмаганидек, ўзга тилларни ҳурмат қилиш ҳам уни давлат тили қилиб қўйиш дегани эмас.
Шу оддий ҳаёт ҳақиқатини англаганида балки бу қалтис таклиф муаллифлари бундай асоссиз, мантиқсиз фикрни ўртага ташламаган, халқ хоҳиш-иродаси билан боғлиқ масалада сўз айтишнинг масъулиятини сал тушунган бўлишарди. Улардан бир нечаси бу таклифни билдирмаганини айтишган. “Давлат тили ҳақида”ги қонунда белгиланган қоидаларни кўпчилигимиз биламиз, албатта. Партиядошларимиз амалдаги қонунлар қатори мазкур қонун ижросини назорат қилишда ҳам фаол иш олиб бориши зарур.
Ривож ОТАРБАЕВ,
Ўзбекистон “Адолат” СДП
Қорақалпоғистон Республикаси
ҳудудий Кенгаши раиси ўринбосари
Бизни ижтимоий тармоқларда ҳам кузатинг:
t.me/adolat_uz
instagram.com/adolat_sdp/
facebook.com/sdpu.adolat/
twitter.com/AdolatSDP
...
Мен кўп йиллардан буён халқ таълими тизимида фаолият олиб бораман. Ўтган йиллар давомида жуда кўплаб шогирдлар тайёрладим. Айни пайтда улар халқ хўжалигининг турли соҳаларида ислоҳотлар муваффақиятини таъминлашда ҳисса қўшиб келишаяпти.
Мамлакатимизда бугун ҳақиқатдан ҳам, ёшлар масаласи давлат сиёсати даражасига кўтарилди. Президентимиз ва ҳукуматимиз томонидан биз педагогларга ҳамда ёш авлодга катта ғамхўрлик кўрсатиб келинмоқда. Буни оммавий ахборот воситаларида эълон қилинган Президентимизнинг 2019 йил 3 майдаги “Иқтидорли ёшларни аниқлаш ва юқори малакали кадрлар тайёрлашнинг узлуксиз тизимини ташкил этиш чора-тадбирлари тўғрисида”ги қарори ҳам яна бир карра тасдиқлаб турибди.
Юртимизда амалга оширилаётган ислоҳотларга ёшларни кенг жалб этиш, уларни изланувчанликка, илм-фанни ўзлаштиришга қизиқтириш, иқтидорли ёшларни аниқлаш, рағбатлантириш сира кечиктириб бўлмайдиган вазифадир. Шунинг учун ҳам мен Президентимиз қарорини ўз вақтида қабул қилинган деб ҳисоблайман.
Шу ўринда бундан буён умумий ўрта таълим мактаблари, академик лицей ва касб-ҳунар коллежлари ўқувчилари ўртасида нодавлат фан олимпиадаларини ташкил этилиши, халқаро олимпиадаларга қатнашиш ҳуқуқини қўлга киритган ўқувчиларга малакали профессор-ўқитувчилар, хорижлик мутахассислар машғулотлар олиб бориши айни муддао бўлди.
Иш фаолиятим даврида кузатдимки, одамлар қайси соҳада бўлса ҳам қилган меҳнатига яраша моддий рағбатлантирилса, қизиқиши ортади. Янада самаралироқ ишлашга ҳаракат қилади. Жумладан, бундан кейин халқаро олимпиадаларнинг ғолиб ўқувчилари ва уларнинг ўқитувчилари бир марталик пул мукофотлари билан тақдирланиши, қолаверса, жойларда ўтказиладиган олимпиадаларнинг республика босқичи ғолибларининг ўқитувчиларини ҳам пул мукофотлари билан рағбатлантирилиши адолатли бўлди.
Шунингдек, Халқ таълими вазирлиги тизимидаги иқтидорли ўқувчилар билан ишлаш департаментининг 2019-2020 ўқув йилидан бошлаб Давлат тест маркази билан биргаликда умумий ўрта таълим мактабларининг 4-11 синф, академик лицей ва касб-ҳунар коллежлари ўқувчилари учун ҳар чоракда онлайн тарзда олимпиадалар ташкил этилиши ҳам жуда яхши бўлди. Шу усул туфайли иқтидорли ўқувчиларни аниқлаш ва уларни чуқурлаштирилган материаллар билан мунтазам таъминлаб бориш имконияти яратилади.
Мен Ўзбекистон “Адолат” СДП аъзоси сифатида Президентимизнинг ушбу қарори партиямизнинг шу кеча-кундузда олиб бораётган фаолиятига ҳам ҳамоҳанг эканлигини мамнуният билан қайд этмоқчиман. Масалан, қарорда математика, физика, кимё, биология, информатика ва ахборот технологиялари йўналишлари ғолибларини аниқлаш ва улар билан мунтазам ишлаш ҳақида айтилади. Партиямиз томонидан ҳам барча фанлар бўйича инновацион йўналишда илмий изланишлар олиб бораётган иқтидорли ёшлар аниқланиб, улар фаолияти қўллаб-қувватлаб келинмоқда. Шу туфайли ҳам бу қарор биз “Адолатчи”ларнинг мақсад ва вазифаларимизга тўғри келиши билан аҳамиятлидир.
Умуман олганда, ҳар қайси давлатнинг халқаро майдондаги обрўси ва нуфузини оширишда ёш авлодга бўлган эътибори катта ўрин тутади.Мен мутахассис сифатида Президентимизнинг ушбу қарори айни вақтида қабул қилинган муҳим ҳужжат эканлигини юқори баҳолайман. Юртимизда иқтидорли ёшлар кўп. Улар келажакда албатта Ўзбекистон довруғини дунё миқёсида таратиб, аждодларимизга муносиб эканликларини намойиш этадилар. Мен бунга ишонаман.
Дилрабо ЧОРИЕВА,
Қарши туманидаги 69-умумтаълим
мактабининг ҳуқуқшунослик
фани ўқитувчиси,
Ўзбекистон “Адолат” СДП фаоли
Бизни ижтимоий тармоқларда ҳам кузатинг:
t.me/adolat_uz
instagram.com/adolat_sdp/
facebook.com/sdpu.adolat/
twitter.com/AdolatSDP
...
9 май – Хотира ва қадрлаш куни мамлакатимизда бу йил кўтаринки руҳда нишонланди. Иккинчи жаҳон урушининг ҳар бир қатнашчиси, фронт ортида меҳнат қилган фахрийлар ҳамда мустақиллик йилларида хизмат бурчини бажариш чоғида ҳалок бўлган ҳарбий хизматчиларимиз ҳамда ҳуқуқни муҳофаза қилиш органлари ходимларининг хотираси олдида ҳурмат бажо келтириш барчамиз учун ҳам қарз, ҳам фарздир.
Шу мақсадда пойтахтимиздаги Ботаника боғида Ўзбекистон Республикаси Президенти Шавкат Мирзиёевнинг Хотира ва қадрлаш кунига бағишланган маросимда иштирок этиши, ғалабанинг 74 йиллиги билан барча фахрийларни ва улар орқали бутун халқимизга қарата йўллаган байрам табриги барчамизда ўзгача фахр туйғусини уйғотди.
Президентимиз табригида Ватанга садоқатли ёш авлодни тарбиялаб, вояга етказган, ҳаёт йўлларида бизларга таянч ва суянч бўлаётган табаррук инсонлар олдида доимо қарздор эканимиз, шу маънода, мўътабар фахрийларга эътибор ва ғамхўрликни янада кучайтиришимиз лозимлиги алоҳида таъкидланди. Мамлакатимизда бу каби инсонларни ижтимоий қўллаб-қувватлаш давлатимиз сиёсатининг устувор йўналишидан бирига айланган ва ўйлайманки, бундан кейин ҳам шундай бўлиб қолади.
Юртимизда бугунги кунда қабул қилинаётган барча ҳуқуқий ҳужжатлар, режа ва дастурлар, мамлакатни модернизация қилиш, иқтисодий ислоҳотларни чуқурлаштириш, давлат ҳокимияти ва бошқарув тизими очиқлигини таъминлаш, соғлиқни сақлаш, таълим-тарбия соҳалари фаолиятини такомиллаштириш, Қуролли Кучларимизнинг жанговар салоҳиятини юксалтириш каби вазифаларнинг туб негизида аждодларимиздан бизга мерос бўлиб келаётган миллий маънавиятга уйғунлик туйғуси мужассамдир. Шунингдек, ҳамжиҳатлик, инсонийлик, бағрикенглик ва хайр-саховат муҳитини янада мустаҳкамлаш, ёш авлодни миллий анъаналаримизга садоқат ва умуминсоний қадриятларга ҳурмат руҳида камол топтиришга қаратилгандир.
Ушбу тадбирлар доирасида шунга амин бўлдимки, мамлакатимизда қарор топган тинчлик ва осойишталик, ҳаётимиз фаровонлигида халқимизнинг ана шундай мард фарзандларининг хизмати беқиёс эканини ҳар бир фуқаро ич-ичидан ҳис этиб турибди. Ушбу дориламон кунлар учун жанг майдонларида жон берган, суронли ва таҳликали кунларнинг гувоҳи бўлган, урушда қаҳрамонларча ҳалок бўлган ота-боболаримизни эслаш, бугун кексалик гаштини сураётган нуронийларимизга ғамхўрлик кўрсатиш ҳар биримизнинг муқаддас бурчимиздир. Зеро, хотира – азиз, қадр – муқаддас.
Алишер МАХМАТМУРОДОВ,
Олий Мажлис Қонунчилик палатаси депутати,
“Адолат” СДП фракцияси аъзоси
Бизни ижтимоий тармоқларда ҳам кузатинг:
t.me/adolat_uz
instagram.com/adolat_sdp/
facebook.com/sdpu.adolat/
twitter.com/AdolatSDP
...
Манзилимиз:
Тошкент шаҳри, Чилонзор тумани, Шарқ тонги кўчаси, 23-уй. Мўлжал: Озарбайжон Республикаси элчихонаси:
Телефон:
71-2730731 71-2884654 (139)
Электрон манзил:
adolat.sdp@exat.uz
САЙТ ТЕСТ РЕЖИМИДА ИШЛАМОҚДА:
www.adolat.uz веб-сайти 2018 йилнинг 21 май куни электрон ОАВ сифатида давлат рўйхатидан ўтказилган. Гувоҳнома рақами: 1232. Муассис: Ўзбекистон Адолат СДП. Таҳририят манзили: 100043, Тошкент шаҳри, Чилонзор тумани, Шарқтонгги кўчаси, 23-уй. Электрон манзил: info@adolat.uz
Сайт материалларидан фойдаланилганда Фойдаланиш шартларига амал қилиниши шарт. Барча ҳуқуқлар Ўзбекистон Республикасининг оммавийахборот воситалари тўғрисидаги ҳамда муаллифлик ва турдош ҳуқуқлар тўғрисидаги қонун ҳужжатларида белгиланган тартибда ҳимояланган
.jpg)
