Аёлларга эътибор – келажакка эътибор

Ўзбек халқининг ажойиб ва ҳаётбахш миллий қадриятлари бисёр. Мустақиллик йилларида улар янада ривожланиб, сайқал топди, янги мазмун билан бойиди. Ана шундай  одатлардан бири нафақат оилада, балки жамиятда ҳам ўзига яраша муносиб ўрин эгаллайдиган хотин-қизлар  учун шарт-шароит яратишдир.

Юртимизда қадимдан аёлга  ҳурмат-эътибор кўрсатиш, қадрлаш қутлуғ анъанага айланганлиги ҳаммага аён.  Чунки у биринчи навбатда   она, келажак авлодни дунёга келтириб, тарбиялаб вояга етказувчи инсон. Шу туфайли  жамиятда  ўз ўрнига эга.  Демак, биз аёлни қанча кўп эъзозласак, бу эртанги кунимиз, истиқболимиз ҳақида ғамхўрликдир.

Мамлакатимизда куни кеча Халқаро хотин-қизлар кунининг кенг миқёсда ва кўтаринки руҳда нишонланиши ҳам мазкур фикрларни яна бир бор тасдиқлади. Ўзбекистон Республикаси  Президенти Шавкат Мирзиёевнинг Халқаро хотин-қизлар кунига бағишланган тантанали маросимдаги нутқида таъкидланганидай, “Кейинги йилларда мамлакатимизда хотин-қизларнинг ҳуқуқ ва манфаатларини, гендер тенгликни таъминлаш, оила, оналик ва болаликни ҳимоя қилиш, аёллар ўртасида тадбиркорликни ривожлантириш, улар учун янги иш ўринлари яратиш, меҳнат ва турмуш шароитларини яхшилаш давлат сиёсатининг устувор йўналишига айланди. Бугун сиз, азизларнинг чеҳрангизда хурсандчилик, шукроналик ифодасини кўриб, ана шундай ишларимиз натижасини оз бўлса-да, ҳис этмоқдамиз. Ва биз мана шу тўғри йўлни давом эттириш, унинг самарасини янада ошириш учун бор куч ва имкониятларимизни сафарбар этамиз.”

Давлатимиз раҳбарининг бу сўзлари замирида юртимизда амалга оширилаётган кенг кўламли демократик ислоҳотлар натижасида аёлларимизнинг сиёсий-ижтимоий жараёнлардаги иштироки тобора кучайиб бораётганлиги акс этади. 2019 йил  йил декабрь ойида ўтказилган   сайловлар натижалари ҳам шундан далолат. Ҳозир  Олий Мажлис Қонунчилик палатасига сайланган 150 нафар депутатнинг 48 нафари ёки 32 фоизини хотин-қизлар ташкил этмоқда. Бу кўрсаткич Сенатда ва маҳаллий кенгашларда 25 фоиздан ошди.

Президентимиз ўз нутқида Ўзбекистон тарихида биринчи марта миллий парламентда аёллар сони Бирлашган миллатлар ташкилоти томонидан белгиланган тавсияларга мос даражага етганлигини ҳам қайд этди. Мамлакатимиз парламенти аёл депутатлар сони бўйича дунёдаги 190 та миллий парламент ўртасида 37-ўринни эгаллаб турибди. Агар беш  йил Ўзбекистон бу борада 128-ўринда бўлганлигини эсласак,  нақадар катта силжишга эришилганлиги кўзга ташланади.

Бир неча кун илгари туманимизга ҳам янги ҳоким тайинланди. Ҳозиргача республика хотин-қизлар қўмитаси раисининг биринчи ўринбосари сифатида фаолият олиб борган Зулайҳо Маҳкамова туманни бошқаришга киришди. Ҳамюртларимиз бу воқеани  давлатимиз томонидан аёлларга билдирилган юксак ишонч сифатида баҳоладилар.

Шу ўринда бугунги кунда мамлакатда давлат ва жамоат ташкилотлари тизимида 1380 нафардан зиёд хотин-қизлар раҳбарлик лавозимларида ишлаётганлигини ҳам айтиб ўтиш лозим. Партиямизнинг вилоят ташкилотида ҳам бешта туман кенгашини аёллар бошқармоқда. “Адолат” СДП фаолиятини йўлга қўйишда, унинг аҳоли ўртасидаги нуфузини оширишда Ҳабибахон Мирзаабдуллаева, Раънохон Умарова, Ёрқиной Ҳожиматова, Зоҳидахон Ҳайитова каби раисларимиз жонбозлик кўрсатиб меҳнат қилмоқдалар.

Партиядошларимиз ўзларининг кундалик фаолиятларида ҳам хотин-қизлар масаласига жиддий эътибор қаратмоқдалар.  Уларнинг бўш вақтларини мазмунли ташкил этиш, бирор-бир фаолият билан шуғулланишларига кўмаклашиш, ишсизларни иш билан  таъминлаш, ижтимоий кўмаклашиш диққат марказимизда турибди. Биз бу борадаги ишларни келгусида янада кучайтирамиз. Зотан, давлатимиз раҳбарининг бераган йўл-йўриқлари ва кўрсатмалари ҳам барчамизни шунга даъват этади.

Заҳрохон АҲМЕДОВА,

Ўзбекистон “Адолат” СДП

Тўрақўрғон туман кенгаши раиси.