Бир кишига берилган имтиёз юзлаб инсонлар ҳаётига хавф солмоқда

Бугунги кунда коронавирус инфекцияси хавфини камайтириш учун республикамиз бўйлаб карантин чоралари жорий этилди. Ўрни келганда айрим чоралар кучайтирилмоқда. Жумладан, жорий йилнинг 30 март соат 06:00 дан 20 апрель соат 00:01 га қадар вилоятлараро, Тошкент ва Нукус шаҳарлари ҳамда вилоятлар марказларида Давлат хизматлари марказлари томонидан бериладиган махсус рухсатнома(стикер)лар асосида автотранспорт воситалари ҳаракатланишига рухсат берилади.

Шу ўринда амалдаги карантин учун қўлланилаётган чораларга нисбатан ўз фикрларимни билдириб ўтсам.

Биринчидан, жисмоний шахсларга тегишли бўлган автомобилларга рухсатнома бермаслик керак эди. Инсон ҳаёти билан боғлиқ ҳолатларда шахсий автомобиллардан фойдаланиш ҳуқуқи берилганлигининг ўзи кифоя. Ҳозирги кунда Тошкент шаҳрида деярли автомобиллар ҳаракти учун қўйилган бу чекловнинг ўрни билинмади. Ҳар куни бундай рухсатномаларни олиб, ҳаракатланаётган транспорт воситалари сони ортиб бормоқда. Кўчаларда транспорт қатнови ва хизмати борлигини билган юртошларимизнинг ҳам ҳаракатланиши ортмоқда.

Шунингдек, бу транспорт воситалари кун давомида карантин қоидаларига биноан 2-3 марталаб дизенфекция қилинмасдан ҳаракатланиб, 20-30 йўловчига хизмат кўрсатмоқда. Кеча Санитария-эпидемиология назорати давлат инспекцияси бошлиғи Нурмат Отабеков томонидан касаллик қўзғатувчиси Ўзбекистон ҳудуди бўйлаб ҳаракатланиб юрганлиги маълум қилинди. Бу каби гигиеник талабларга риоя қилмасдан ҳаракатланаётган жисмоний шахсларга тегишли бўлган автотранспорт воситалари асосий инфекция ташувчи бўлиб қолмақда. (Коронавирус инфекциясининг темир буюмларда сақланиб туриш муддати ҳам юқори эканлиги тасдиқланган.) Энг ачинарлиси кун сайин касаллик аниқланган ҳудудлар сони ҳам ортиб бормоқда.

Иккинчидан, карантин қоидаларига кўра 25 март санасидан фуқароларимизнинг кўчада ҳаракатланганда ниқобсиз юриши тақиқланган бўлишига қарамасдан, бундай тартибга амал қилмаётган фуқаролар сони кун сайин камайиш ўрнига ортиб бормоқда. Заруратсиз кўчага чиқиб, маҳаллаларда 5-6 кишилашиб ўзаро суҳбат қуриб турган ёшларни ҳам учратиш мумкин. Шу боис фуқароларнинг ҳақиқатдан дори ёки озиқ-овқат маҳсулотлари учун чиқмаганлиги аниқланган тақдирда ҳам чора кўриш амалиётини қўллаш зарур.

Учинчидан, озиқ-овқат маҳсулотларига ихтисослашган дўконларда фуқаролар гигиеник қоидаларга амал қилмасдан истаган маҳсулотларини олиб, танлаб, маъқул тушмагач яна жойига қайтариб қўйишмоқда. Ҳозиргача фақатгина супермаркетлардагина қириш қисмларида гигиеник воситалар ўрнатилди. Ҳеч бир озиқ-овқат дўконлари, супермаркетлар ва дорихоналарда ижтимоий масофага амал қилингани йўқ. Карантин даврини ўз вақтида якунлаш учун озиқ-овқат маҳсулотларининг ҳам гигиеник қоидаларга амал қилган ҳолда бир кунда бир маҳал маҳаллалар кўчаларида сотишни жорий қилиш лозим.

Қанчалик масъулият билан карантин қоидаларига амал қилсак, ўз ватқида бу инфекциянинг кенг ёйилишига қоидага мувофиқ қарши курашсак, мамлакатимизни бу вирусдан буткул бартараф этишга эришамиз.

Фаррух АБДУҲАМИДОВ,

Халқ депутатлари

Арнасой туман Кенгаши депутати