Депутат карантинда қолган африкаликка кўмак берди

Карантин чекловлари тақозосидан юртимизда меҳмон бўлиб турган Африка қитъаси, Кот-д’Ивуар Республикасидан футболчи  Камара Ҳалил ўз юртига қайтиб кетолмай қолди.У мазкур давлатнинг «Berjin villi» жамоаси аъзоси ҳисобланади. Шунингдек, 4 йил давомида Россияда ҳам легионер сифатида фаолият олиб борган. Унинг маҳоратиига Қирғизистон ҳам қизиқиб қолган ва уни кўрикдан ўтказиш мақсадида йиғинга жалб қилган. Қирғизистон вакиллари уни Тошкентда синовдан ўтказишган ва 25 ёшли футболчининг ҳаракатлари уларга маъқул келмаган. Шундан сўнг Камара Ҳалил ўз юртига қайтиб кетиши керак эди. Бироқ юртимизда жорий қилинган карантин туфайли у ўз ватанига учиб кета олмай, Тошкентда қолиб кетди.

Бағрикенг, саҳоватпеша халқимиз унга ўз уйларининг тўридан жой берди. Хусусан, халқ депутатлари Тошкент шаҳар Кенгаши депутати Ташпўлат Матибаев Камара Ҳалилнинг ҳолидан доимий хабар олиб турди. Кези келганда моддий тарафдан қўллаб-қувватлади.

Ташпўлат Матибаев, Халқ депутатлари Тошкент шаҳар Кенгаши депутати, «Сиҳатгоҳ» санаторийси бош шифокори:

- Февраль ойининг ўрталарида бизга Қирғизистондан меҳмонлар, яъни, спортчилар келди. Локоматив марказида бир муддат спорт билан шуғулланишди. Санаториямизда даъволанишди. Кот-д’Ивуардан келган меҳмон ўз юртига учиб кетиш пайида юрганида карантин бошланиб қолди. Мусулмон экан, рўза тутаётган экан. Савоб бўлади, деб уни ўз қарамоғимизга олдик.

Икки ойдан бери юртимизда истиқомат қилиб келаётган африкалик спортчи мехмондўст халқимизнинг ёрдами туфайли ўлкамиз шароитига тезда кўникиб кетди. Хатто, ўзининг таъкидлашича, шу ерда қолиб, уйланиш нияти ҳам бор. Бироқ уни ўз юртида яқинлари кутмоқда. Ўйлаймизки, карантин тугаганидан сўнг у ўз ватанига, яқинлари бағрига қайтади.

Мехринисо БОБОНАЗАРОВА,

Ўзбекистон «Адолат» СДП

Тошкент шаҳар Кенгаши

матбуот котиби