Коррупцияга қарши муросасиз курашамиз

Коррупцияга қарши курашишда “ҳалоллик вакцинаси” билан эмланган янги авлодни тарбиялаш устувор вазифа демакдир. Келажак авлодни соғлом руҳдаги инсонлар қилиб камолга етказиш жамиятнинг келажаги учун хизмат қилади. Ўзбекистон “Адолат” СДП Андижон туман кенгаши ташаббуси билан Андижон қишлоқ хўжалиги ва агротехнологиялар институтида “Ҳалоллик вакцинаси-тараққиёт гарови” мавзусида ташкил этилган давра суҳбатида айни шу тўғрида сўз юритилди.

Давра суҳбатида Андижон туман ИИБ профилактика инспектори Умиджон Ғаппоров коррупция жиноятчилиги, унинг жамият ривожига салбий таъсири ва амалдаги қонунчилик юзасидан тушунча берди. Фуқароларнинг ҳуқуқий маданиятини юксалтириш бу борада катта аҳамиятга эга эканлигини таъкидлади.

Абдусалом Махсуталиев, “Адолат” СДП фаоли, Андижон қишлоқ хўжалиги ва агротехнологиялар институтининг Ёшлар масалалари ва маънавий-маърифий ишлар бўйича биринчи проректори:

-Коррупция юзага келишининг асосий сабабларидан бири қонунларимизни яхши билмаслигимиз. Ёшларга бу борада дарсларда тушунтириляпти. Бироқ бу етарли эмас. Давлатимизнинг жиноятчиликларга қарши курашишга қаратилган сиёсатини уларга тўла етказишни ўз олдимизга мақсад қилиб қўйганмиз. Ҳуқуқшунос ва мутахассислар томонидан иштирокчиларга атрофлича тушунча берилди. Ишонаманки улар ҳар қандай жиноятчиликни олдини олиш мумкинлиги, агар барчамиз бир бўлсак коррупциянинг ҳам олдини олишга эришишимизни тушуниб еттилар.

Президентимиз Шавкат Мирзиёев “Коррупцияга қарши курашишда аҳолининг барча қатламлари, энг яхши мутахассислар жалб қилинмас экан, жамиятимизнинг барча аъзолари, таъбир жоиз бўлса, “ҳалоллик вакцинаси” билан эмланмас экан, ўз олдимизга қўйган юксак марраларга эриша олмаймиз. Биз коррупциянинг оқибатлари билан курашишдан унинг барвақт олдини олишга ўтишимиз керак”, дея таъкидлаган эди.

Чиндан хам шундай. Яна бир масалани унутмаслигимиз керак. Коррупцияни олдини олиш биргина соҳа ходимларининг вазифаси эмас “Ёш адолатчилар” олдига коррупцияга йўл бермаслик ва тенгдошлари орасида бу борада тушунтириш ишларини олиб бориш вазифаси қўйилди.

Олимжон Раҳимов,

Ўзбекистон  “Адолат”  СДП Андижон туман кенгаши раиси.