Номзодлар нималарни ваъда қилишмоқда?

Сайлов комиссиялари томонидан ташкиллаштирилаётган депутатликка номзодларнинг халқ билан учрашувлари ҳар томонлама самарали кечмоқда. Хусусан, жорий йилнинг 25 ноябрь куни Гулистон шаҳар хорижий тилларга ихтисослаштирилган мактаб-интернатида тузилган 2-Ахиллик сайлов округида ўтказилган учрашув ҳам сиёсий партиялар томонидан кўрсатилган депутатликка номзодлар ва уларнинг ишончли вакиллари учун тажриба майдони сифатида бўй кўрсатди. Унда вилоят ва шаҳар Кенгашига кўрсатилган номзодлар ва уларнинг ишончли вакиллари халқ олдида нутқ сўзлади.

Ўзбекистон “Адолат” СДПдан Халқ депутатлари вилоят ва шаҳар Кенгашларига кўрсатилган номзодлар А.Атабаев ва Б.Абдуллаевлар сайловолди дастуридан келиб чиққан ҳолда ўз дастурлари билан йиғилганларни таништирди.

Таъкидландики, депутат этиб кўрсатилган номзодлар у ёки бу муаммони бевосита ҳал қилиб бериш учун эмас, балки давлат идоралари ва халқ ўртасида кўприк вазифасини бажариб, юзага келаётган муаммоларни ўрганиб, уларнинг бажарилишини тегишли жойларга киритиш вазифасидир. Шунингдек, партиянинг депутатликка номзодлари тарафидан бу йилги сайловлар олдингиларидан кескин фарқ қилгани ҳолда келгусида ҳар бир сайланган депутатга ушбу вазифанинг залвори улкан масъулият юклаши муқаррар эканлиги эътироф этиб ўтилди.

Меҳринисо БОБОНАЗАРОВА,

Ўзбекистон “Адолат” СДП

Сирдарё вилоят Кенгаши

матбуот котиби