Оқолтиндаги митинг коррупцияни қоралади

Ўзбекистон “Адолат” СДП Оқолтин туман Кенгаши томонидан туман Маданият марказида сайловолди тарғибот акцияси ўтказилди. “Биз коррупцияга қаршимиз” шиорини олган ушбу тарғибот тадбирида партия фаоллари, бошланғич партия ташкилотлари аъзолари, депутатлар, депутатликка кўрсатилган номзодлар ва кенг жамоатчилик вакиллари иштирок этишди.

Тадбир мавзусидан келиб чиқиб, кенг томир ёйган иллатни бартараф этиш бугунги кунда жамиятда яшаётган ҳар бир кишининг улуғ вазифаси эканлиги таъкидланди. Тадбир ташкилотчилари томонидан коррупция жиноятига қарши курашиш бўйича зарур тавсиялар берилар экан, партия сайловолди дастурида ҳам ушбу иллатга қарши курашиш бандлари тўлиқ акс этганлиги айтиб ўтилди. Албатта, бу кураш босқичма-босқич давом этиб, оқибатда мамлакатда коррупцияни бутунлай йўқ қилишга эришиш, илдизигача қуритиш вазифаси китирилганлиги алоҳида эътироф этилди. Шунингдек, бу вазифа нафақат давлат идоралари вакиллари, балки кенг жамоатчиликнинг ҳам муҳим ва масъулиятли бурчи эканлиги баён этилди. Ўз навбатида билдирилган фикрлар, янграб ўтган хитоблар иштирокчилар томонидан қўллаб-қувватланди.

Малика Қорабекова, пенсионер:

-Жамиятда порахўрлик, коррупция иллатининг авж олиши мамлакат тараққиёти йўлида олиб борилаётган ҳар қандай ислоҳотларга тўсқинлик қилиши бор гап. Бунга неча минг йиллик тарих гувоҳ. Шахсан ўзим ҳам неча йиллик бой тажрибамдан келиб чиқиб, ушбу иллатнинг мавжудлиги юрт келажагига раҳна солиши мумкинлигини қалбан ҳис қиламан. Шунинг учун ҳам “Адолат” СДПнинг ташаббусларини қўллаб-қувватлайман. Фарзандларимга, набираларимга бу борада таълим беришдан асло чарчамайман.

Ўткир ҚУДРАТОВ,

Ўзбекистон “Адолат” СДП

Оқолтин туман Кенгаши раиси