“Саховат ва кўмак”: Кам таъминланган оилалар ҳар ҳафта ўрганилмоқда

Кам таъминланган оилаларга кўмак бериш мақсадида биз ҳар ҳафтада бир кунни оилалар шароитини ўрганиб чиқишга ажратганмиз. Ўрганиш ишлари якунида ижтимоий ҳимояга муҳтож, кам таъминланган оилалардан 10 нафарига бепул озиқ-овқат маҳсулотларини етказиб бериш ишларини йўлга қўйдик.

Хусусан, ушбу ҳафтанинг ичида ҳам 10 та кам таъминланган хонадонларга бориб, жами 500 кг. ун, 20 кг. гўшт маҳсулотлари ва яна 5 турдаги озиқ-овқат маҳсулотларини тадбиркорлар ва маҳалла фаоллари иштирокида топширдик. Шу билан бир қаторда уларга томорқадан унумли фойдаланиш борасида тушунтириш ишларини олиб боряпмиз.

Кимда кўчат ёки қайсидир уруғни олишга имкон бўлмаса уни ҳам етказиб беришга кўмаклашяпмиз. Мана, бугун ҳам 5 та хонадонда бўлдик ва уларнинг томорқа фаолиятини ўрганиб, зарур бўлган кўчат ва уруғларни етказиб бердик. Бу орқали биз аҳолининг томорқадан унумли фойдаланиш ҳамда оила турмуш даражасини аста-секинлик билан ошириб бормоқдамиз.

Шунингдек, Сирдарёда юзага келган ҳолат туфайли азият чекаётган юртдошларимизга ҳам кўмак сифатида ташкил этилган партиянинг “Сардоба сари саховат карвони” акциясига ўз ҳиссамизни қўшдик. Биз бу эзгу ишларни келгусида ҳам давом эттирамиз.  

Бурхон УМАРОВ, 

Халқ депутатлари Қўшработ тумани Кенгаши депутати