«ШҲТ - Дўстлик ташкилоти»

Бугун кўҳна ва навқирон, ер юзининг сайқали бўлган Самарқанд шаҳри Шанхай Ҳамкорлик Ташкилотининг навбатдаги олий даражали учрашув саммитига мезбонлик қилмоқда. Бунда қатор давлатлар раҳбарлари, нуфузли халқаро ташкилотлар вакиллари иштирок этмоқда. Албатта, Самарқандда бўлиб ўтаётган ушбу учрашув муҳим халқаро аҳамиятга эга. Учрашувда илк бор Эрон Ислом Республикаси иштирок этаётгани ҳам тарихий воқеадир. Таъкидлаш керакки, Эрон Ислом Республикаси ушбу ташкилотга 2005 йилда кузатувчи давлат сифатида кирганди. 2021 йил Душанбе саммитида аъзо бўлиб кириш ҳаракатлари бошланди. Бугун Самарқандда бўлиб ўтаётган саммитда эса Эрон Ислом Республикаси ташкилотга тўлиқ аъзолик мақомини берадиган мажбуриятлар вазифасини қабул қилмоқда. Бир йил давомида ушбу мажбуриятлар бажарилгандан сўнггина Эрон тўлиқ ШҲТга аъзо давлат сифатида киради. Бу аъзоликнинг Ўзбекистон учун ҳам Эрон учун ҳам қолаверса, ташкилотга аъзо барча давлатлар учун муҳим аҳамиятга эга бўлган жиҳатлари талайгина. Аввало, транспорт-логистика, халқаро савдо йўли ва инвестициявий ҳамкорликни кучайтириш масалалари долзарб устуворлик касб этади. Шунингдек, мамлакатлар аро ўзаро тинчлик, дўстона муносабатларни ривожлантириш ташкилотнинг бош мақсадидир. Зеро, Дмитрий Песков айтганидек, «Ҳеч ким ШҲТ олдига ҳарбий ташкилот муқобили бўлиш вазифасини қўймайди. Бу – кимгадир қарши эмас, дўстлик ташкилоти».

Саммит доирасида бўлиб ўтаётган бу каби йўналишларга муҳим эътибор қаратилаётгани фонида Арманистон ва Озарбайжон давлатлари ўртасида тинчлик келишувига эришилгани алоҳида диққатга сазовор воқелик сифатида эътироф этилди. Айтиш керакки, икки давлат ўртасида бўлиб ўтган можарода икки халқ вакиллари кўп жабр тортган эди. Бугун улар ўртасидаги ярашув дунёда тинчлик овози жаранглашига хизмат қилмоқда.

Ўзбекистонга қўшни давлатлар: Тожикистон, Туркманистон, Қирғизистон, Қозоғистон кабиларнинг саммит доирасидаги учрашувларида ҳам ўзаро қўшничилик муносабатларига алоҳида эътибор қаратилиб, келгусидаги ҳамкорликларни кучайтириш, чегаравий савдо-сотиқ, ишлаб чиқариш, саноат соҳаларида илгари сурилган мақсадларни жадал амалга ошириш режалари белгилаб олинганлиги яна бир муҳим устувор жиҳатлардандир.

         Алишер Тоштемиров,

“Адолат” СДП Тошкент шаҳар Кенгаши раис ўринбосари