Урганчлик адолатли қайнона

Ўзбекистон “Адолат” социал-демократик партияси Сиёсий Кенгаши ташаббуси билан ҳар йил ўтказилаётган “Адолатли қайнона” кўрик-танлови  юртдошларимиз томонидан илиқ кутиб олинмоқда.

Айни пайтда  воҳамизда кўрик-танловнинг  шаҳар ва туман босқичларини ўтказиш қизғин паллада.

Хусусан, куни кеча Урганч шаҳри “Навбаҳор” маҳалласида ташкил этилган  танлов ҳам лойиҳа мақсадини ҳаётга татбиқ этишга хизмат қилди.

Карантин ва лойиҳа  талаблари асосида  бўлиб ўтган  кўрик-танловда “Навбаҳор” маҳалласи Жиззах кўчаси 38 хонадонда яшовчи, 31 йил Урганч шаҳридаги  4-сон умум ўрта таълим мактабида келажак авлодга  таълим берган,  3 нафар келиннинг  қайнонаси, шириндан-шакар набирларнинг бувижониси  Анажон Эшчанова ғолибликни қўлга киритди ва “Адолатли  қайнона” деб топилди.

Анажон Эшчанова, кўрик-танлов ғолиби, адолатли қайнона:

-Ҳар йили “Адолатли қайнона” кўрик-танловига томошабин сифатида иштирок этиб келаман. Лойиҳанинг номини ўзи жозибадорлиги билан  диққатни тортади. Танловга иштирок этишни мақсад қилгандим, ниятларим амалга ошди. “Адолатли қайнона” деб топилганимдан жуда хурсандман. Ташкилотчиларга раҳмат.

Мухтасар айтганда, кўрик-танловнинг ҳаётга татбиқ этилгани  оила ва никоҳнинг муқаддаслиги, оилаларнинг мустаҳкамлигини таъминлаш, ибратли  аёлларни ёш оилаларга намуна этиб кўрсатиш ва уларнинг оила ва жамиятдаги ҳаётий тажрибаларини ёш авлод онгига сингдиришда аҳамиятли бўлмоқда.

Тадбир сўнгида фаол иштирок этган иштирокчилар  партиянинг ташаккурномаси  ва эсдалик совғалари  билан тақдирландилар.

                                                                                                          Замира АБДУЛЛАЕВА,

                                                                                                   Ўзбекистон “Адолат” СДП

                                                                           Хоразм вилоят Кенгаши матбуот котиби