Юртдошларимиз қайси сиёсий партияга кўпроқ ишонади?

Маълумки, бугунги кунда юртимизда 5 та сиёсий партия фаолият олиб бормоқда. Сиёсий партиялар Ўзбекистон Республикаси фуқароларининг қарашлари, манфаатлари ва мақсадлари муштараклиги асосида тузилади, давлат ҳокимияти органларини шакллантиришда жамият муайян қисмининг сиёсий иродасини рўёбга чиқаришга интилади ҳамда ўз вакиллари орқали давлат ва жамоат ишларини идора этишда иштирок этади.
Хўш, бугун фаолият олиб бораётган бешта сиёсий куч аҳоли ичига қай даражада кириб бора олган? Фуқароларнинг сиёсий партияларга нисбатан ишончи, интилиши қай даражада? Бу борада сиёсий партияларнинг умумий аъзолари сонидан келиб чиққан ҳолда ҳам хулоса қилиш мумкин.

Сиёсий партияларнинг ЎзАга тақдим этган статистик маълумотларига кўра, Тадбиркорлар ва ишбилармонлар ҳаракати — Ўзбекистон Либерал-демократик партиясининг 2024 йил 1 январь ҳолатига жами аъзолари сони 1 миллион 330 минг 364 нафардан иборат.

“Адолат” социал-демократик партиясининг умумий аъзолари эса 630 минг 338 нафардан иборат.

Ўзбекистон Экологик партиясининг аъзолари 622 минг 413 нафарга етган.

Ўзбекистон Халқ демократик партияси аъзоларининг жами сони 583 минг 141 нафар бўлса, Ўзбекистон “Миллий тикланиш” демократик партиясининг умумий аъзолари сони 392 минг 425 нафарни ташкил этади.

Юқоридаги рақамлардан кўриш мумкинки, Ўзбекистон Либерал-демократик партияси ўз сафида энг кўп аъзоларни жамлаган сиёсий кучдир. “Адолат” СДП иккинчи ўринни эгаллаган. Ташкил этилганига энди 5 йил тўлган Ўзбекистон Экологик партияси эса аъзолари сони бўйича учинчи ўринни эгаллаган. Ундан кейинги кетма-кетликда эса ХДП ва ЎзМТДП жой олган.

Муҳтарама Комилова, ЎзА