Гулбаҳор Саидғаниева: Президентнинг янги Фармони тадбиркорлар учун айни кутилган ҳужжат бўлди

Мамлакатимизда юзага келган вазият кўпчиликни, айниқса, тадбиркорларни хавотирга солди. Улар бундан кейин қандай фаолият олиб боришга ҳайрон бўлиб қолдилар. Депутат сифатида менга шу яқин кунларда жуда кўп сайловчиларимиз тез-тез: “Кредитимиз бор эди, энди нима қиламиз, қандай тўлаймиз” каби саволларни берар эдилар.

Ўзбекистон Республикаси Президенти Шавкат Мирзиёевнинг 3 апрель куни қабул қилинган “Коронавирус пандемияси даврида аҳоли, иқтисодиёт тармоқлари ва тадбиркорлик субъектларини қўллаб-қувватлашга доир қўшимча чора-тадбирлар тўғрисида” Фармони тадбиркорлик фаолияти ҳимояси учун кўплаб имтиёзлар жамланмаси ўлароқ, ана шу каби кўплаб саволларга жавоб бўлди.

Ушбу Фармон давлат мамлакатдаги тадбиркорларни ҳар қандай шароитда тўлиқ қўллаб-қувватлашини билдирди. Мазкур ҳужжат тадбиркорларнинг оғир кунларда карантин ҳолатида қийинчиликка тушиб қолмаслиги ёки айрим фаолият турлари туфайли мажбур қийинчиликка тушиб қолгани учун уларга кўплаб имтиёзлар беради. Масалан, айрим жиҳатларига эътибор қаратадиган бўлсак, бизга саволлар билан мурожаат қилган тадбиркорларимизнинг фойдасига муҳим бандлар киритилган. Фармоннинг 11-бандида Марказий банк тижорат банклари томонидан молиявий қийинчиликларга дуч келган юридик ва жисмоний шахслар, якка тартибдаги тадбиркорларнинг кредитлари бўйича тўловларга 2020 йил 1 октябрга қадар кечиктириш тақдим этиши учун шарт-шароитлар яратиши ва тартиб-таомилларни соддалаштириш чораларини кўриши белгилаб қўйилган.

Бундан ташқари, карантин тадбирлари даврида ўз фаолиятини тўхтатишга мажбур бўлган якка тартибдаги тадбиркорлар учун жисмоний шахслардан олинадиган даромад солиғи қатъий белгиланган суммасини ва ижтимоий солиқни ҳисоблаш тўхтатилиши Фармоннинг 5-бандида кўзда тутилган.

Фармон кўра, ўз фаолиятини тўхтатган ва (ёки) товарлар (хизматлар) реализациясидан тушуми жорий йилнинг биринчи чорагидаги ўртача ойлик миқдорига нисбатан 50 фоиздан кўпроққа камайган микрофирма, кичик корхона ва якка тартибдаги тадбиркорларга солиқ органларини хабардор қилган ҳолда, 2020 йил 1 октябрга қадар айрим солиқларни фоизсиз кечиктириш (бўлиб-бўлиб тўлаш) ҳуқуқи тақдим этилди.

Ваҳоланки, тадбиркорни қўллаб-қувватлаш миллатнинг, жамиятнинг қўллаб-қувватланишидир. Чунки, тадбиркор ўзини ҳам, давлатни ҳам бойитадиган шахсдир. Унинг фаолияти иқтисодиётни юргизади, ривожлантиради.

Бугун Ўзбекистондаги барча тадбиркорлар Президентимизга ўзининг чексиз миннатдорлигини билдирмоқда. Улар қийин кунларни халқимиз билан бирга тезроқ енгиб ўтиш учун ўз меҳнатини аямасдан, янада кўпроқ меҳнат қилишини таъкидламоқда. Чунки, улар Ўзбекистонда ҳеч бир тадбиркор, ҳеч бир оила, ҳеч бир инсон эътиборсиз қолдирилмаслигига қаттиқ ишонмоқда. Президентимизнинг халқимизга мурожаатлари ҳамда давлатимиз раҳбари томонидан қабул қилинаётган Фармон ва қарорлар, кўрилаётган чора-тадбирлар бунга тўла кафолат бўлмоқда.

Гулбаҳор САИДҒАНИЕВА,

Олий Мажлис Қонунчилик палатаси депутати