Кўрилган чоралар самарасиз бўлмайди

Коронавирус пандемиясига боғлиқ Ўзбекистон Республикаси Президенти яна бир фармонни имзолади.

"Мен бугун  мана шундай қийин вазиятда  иқтисодиётимизни, тадбиркорларни фаол қўллаб-қувватлаш учун яна бир муҳим фармонга имзо чекдим. Қанчалик  мураккаб бўлмасин, бюджетдан катта  харажатларни талаб этмасин, қўшимча  чораларни кўришга қарор қилдим",  деб таъкидлади Президент.

2020 йил 3 апрель куни коронавирус пандемияси келтириб чиқарган инқирозга қарши курашиш шароитида тадбиркорликни қўллаб-қувватлаш масалалари бўйича ўтказилган  видеоселектор йиғилишида Ўзбекистон Республикаси Президенти халқимизга яна бир марта мурожаат қилди. Бу эса Презитентимизнинг халқимизга сўнгги 25  кун ичида қилган учинчи  мурожаати. Давлатимиз раҳбарининг куйинчаклик билан қилган мурожаати ҳар бир кўксида ватанпарварлик ғурури бўлган юртдошимизни яна бир бора огоҳликка чорлади. Мурожаатда мамлакатимизда коронавирус пандемиясига қарши кескин чор-тадбирлар олиб борилаётганлиги таъкидланди.

Жумладан, коронавирус касаллигига чалинганлар, карантинга олинганлар учун яратилган шарт-шароитлар ва бошқа профилактик тадбирлар ҳақида батафсил тўхталди. "Тошкент вилоятида 10 минг кишини қабул қилишга мўлжалланган  карантин зонаси барпо  этилмоқда. Унинг дастлабки бир қисмига хориждан келган 2 минг 200 дан ортиқ  фуқароларимиз жойлаштирилди. Зангиота туманида   10 минг ўринли 2 та вирусология  шифохонаси қурилмоқда. Яқин кунларда ушбу шифо масканларидан 2 мингта ўрин ишга туширилади", деди Президент ўз мурожаатида. Ҳақиқатдан ҳам, ҳар биримиз давлатимиз ғамхўрлигини авваламбор вазиятнинг тез қўлга олинганида, ўқув муассасаларининг ёпилиб, фарзандларимизнинг карантин даврида уйда онлайн тарзда таълим олиши йўлга қўйилганлиги, пенсия  ёшдагиларга пенсия ва нафақаларининг уйига етказиб берилиши жорий этилганлиги,  ногирон, кам таъминланганларга, бошқа ёрдамга муҳтож оилаларга озиқ-овқат, дори-дармонлар етказиб беришнинг тизимли йўлга қўйилганлиги ва бу жараёнга жуда катта маблағлар қаратилаётганининг гувоҳи бўлмоқдамиз.

Мамлакатимизда карантин жорий этилган даврда ҳалқимизни узлуксиз озиқ-овқатлар билан таъминланиши жараёнининг тизимли йўлга қўйилганлиги, карантин даврида юзага келиши мумкин бўлган салбий ҳолатларнинг олдини олди. Фуқароларимиз ўз уйида тинч, осуда ҳаёт кечираётгани, фақат зарурат бўлганда эҳтиёжлари учунгина оиладан битта аъзонинг чиқишига рухсат берилганлиги, ишонч телефонлар жорий этилганлиги  карантин даврининг тартибли ўтишига қаратилган  давлатимизнинг ғамхўрлиги, десак муболаға бўлмайди. Кўчалар, хиёбонлар, бино ва иншоотлар, бозорлар, бутун мамлакатимиз бўйлаб ҳар куни дезинфекцияланмоқда. Дастлабки коронавирус касаллиги рўйхатга олинган кунларида ниқоблар, дезинфекцияловчи воситалар дефицити пайдо бўлган бўлса, ушбу масала ҳам давлатимиз, муҳтарам Президентимиз томонидан қаттиқ талабчанлик билан ижобий ҳал қилинди, бу жараёнга саховатли тадбиркорларимиз, фуқароларимиз  ҳам ўз ҳиссаларини қўшдилар. Дунё юзида ўзининг жиддий талофатлари билан таъсирини ўтказган короновирус пандемияси кўплаб Европадаги етакчи  мамлакатларни ҳам шошириб қўйди. Италия, Испания, АҚШ, Франция, Германия каби дунёнинг ривожланган мамлакатларининг аҳолиси оддий ниқоб,  дезинфекцияловчи воситаларга, озиқ-овқатларга бўлган эҳтиёжи юқорилигича қолиб, ҳал қилинмаётгани интернет ва ОАВ да сиёсатчилар томонидан ёритилаётганининг гувоҳимиз. Презитентимизнинг оталарча ғамхўрлиги остида фуқароларимиздан фақат битта нарса, уйида қолиб, ўзи ва яқинларини авайлаб-асраши сўраляпти холос. Бошқа барча чораларни давлатимиз ўз зиммасига олди. Шундай бўлса ҳам қонунга бўйин эгмаётган, ўзининг ва яқинларининг ҳаётини ҳавф остига қўяётган инсонларни кўриб, эшитиб,  бундай ношукурликка  таажубланасан  киши. Карантин қоидаларига амал қилмаслик оқибатлари бўлишини наҳотки бундай шахслар тасаввур қилмасалар, деган савол туғилади.

Бутун дунё, инсоният мураккаб даврни бошидан кечираётган бугунги кунда мамлакатимизда эпидемиологик вазиятни жиловлаш, аҳоли саломатлигини ҳар томонлама ҳимоя қилиш учун барча чоралар кўрилмоқда. 2020 йил 3 апрель куни "Коронавирус пандемияси даврида аҳоли, иқтисодиёт тармоқлари ва тадбиркорлик субъектларини қўллаб-қувватлашга доир қўшимча чора-тадбирлар тўғрисида"ги Президент фармонига асосан   коронавирус инфекцияси тарқалишига қарши курашиш даврида аҳолини ижтимоий ҳимоя қилишни кучайтириш ва иқтисодиёт тармоқлари фаолият кўрсатишининг барқарорлигини таъминлаш, шунингдек, айрим хўжалик юритувчи субъектларни, тадбиркорликни қўллаб-қувватлашга қаратилган аниқ  чора-тадбирлар амалга ошириладиган бўлди. Жумладан 2020 йил 31 декабрига қадар товарларни олиб киришда божхона божи ва акциз солиғининг ноль ставкалари белгиланди.

Жорий йилнинг март ва июнь ойларида тўлаш муддати тугайдиган болалари бўлган оилаларга нафақа ва бола парвариши бўйича нафақа ва  моддий ёрдамлар тўлаш қайта ариза ва хужжатлар сўралмасдан яна 6 ой  муддатга тўланиши белгиланди. Ўзгалар парваришига муҳтож бўлган ёлғиз  кексалар ва ногиронларга бепул бериладиган озиқ-овқат ва гигиена товарларининг рўйҳати карантин тадбирларини амалга ошириш  даврида бир марталик ниқоблар, антисептик воситалар ва бактерияга қарши совунлар жамламаси билан тўлдириладиган бўлди. Тадбиркорлар учун солиқ имтиёзлари янада купайтирилди. Аҳолини ва тадбиркорларни қийнаб турган жуда кўплаб муаммолар ўз ечимини топди.

Муҳтарам Президентимиз ва ҳукуматимиз томонидан амалга оширилаётган амалий ишлар ҳар биримизнинг қалбимизда коронавирус балосидан эсон-омон қутулишимизга мустаҳкам ишонч туғдиради. Лекин, шуни унутмаслигимиз керак – офатни енгиш ҳар биримизга боғлиқ. Ҳар бир фуқаро ўзини, оиласини, пировард натижада бутун халқини коронавирусдан қутқаришга жон-жаҳди билан ҳаракат қилса, муҳтарам Президентимиз атрофида бир куч бўлиб бирлашса, албатта бу қийинчиликларни енгиш осон бўлади.Уйда қолинг, ўзингиз ва оилангизни асранг!

Зуҳра ИБРАГИМОВА,

Олий Мажлис Қонунчилик палатаси депутати