Аёлини эъзозлаган юрт байроғи юксакларда ҳилпираб туради

Наманган тўқимачилик саноати институтида хотин-қизларнинг сиёсий-ҳуқуқий билимларини ошириш ва оилада аёлларга нисбатан зўравонликнинг олдини олишга қаратилган давра суҳбати бўлиб ўтди.
  Ўзбекистон «Адолат» социал-демократик партиясининг “Бир адолатчи – юз аёлга ҳимоячи” лойиҳаси доирасида “Хотин-қизлар зўравонлигига қаршимиз” мавзусида ўтказилган давра суҳбатида «Адолат» СДП Давлатобод тумани кенгаши раиси Алижон Қодиров, Наманган тўқимачилик саноати институти проректори Абдурашид Жўраев, ички ишлар бўлимининг хотин-қизлар масаласи бўйича инспектори, подполковник Адолат Ҳожиева, хусусий мактаб директори, тадбиркор Матлубахон Мадаминова, ёш тадбиркор, депутат Моҳидил Бўроновалар иштирок этиб, аёлларнинг жамиятда тутган ўрни, ҳақ-ҳуқуқлари, уларнинг олий таълим олишлари, ишлашлари ва касб-ҳунар ўрганишлари бўйича берилаётган имтиёзлар ҳақида гапириб ўтишди ва талаба қизларнинг мазкур институтда яратилган имкониятлардан фойдаланиб, келажакда танлаган касбларининг устаси бўлиб етишишларига ишонч билдирдилар.

   Чиндан ҳам мамлакатимизнинг иқтисодий жиҳатдан юксалишида, обод бўлишида, дунё давлатлари орасида обрў-эътиборининг ошишида маънан соғлом, билимли ва шижоатли фарзандларни дунёга келтираётган аёлларнинг алоҳида ўрни бор. Бир сўз билан айтганда, аёлини эъзозлаган, қадрини кўтарган юртнинг байроғи доимо юксакларда ҳилпираб туради.

Ёрқиной ҲОЖИМАТОВА,
Ўзбекистон «Адолат» СДП
Наманган вилоят Кенгаши раисининг ўринбосари.