Депутат кўмагидан сайловчилар хурсанд

Тўйдихон Алибоева халқ депутатлари Жалақудуқ туман кенгаши депутати сифатида доим жамоатчилик орасида. Жойлардаги мавжуд муаммоларни ўрганиш, ечимини топиш ва фуқаролар билан ишлашда катта тажрибага эга. Шу сабаб сайловчилар унга ишонч билан мурожаат қилишади.
Тумандаги Қороғул маҳалласида яшовчи Ҳалимахон Хўжамова бир неча йилдан буён ишсизликдан қийналаётган эди. Бу масалада кўп жойга учради, аммо натижа бўлмади. МФЙ идорасида депутат қабули ўтказилаётганини эшитиб, у халқ вакилига шу масалада мурожаат қилди. Депутат аралашуви билан тадбиркор Иззатой Абдураҳмоновага қарашли гўзаллик салонига ишга жойлаштирилди. Бундан оиласидагилар ҳам хурсанд.
Ҳалимахон Хўжамова, фуқаро:
- Тўғриси, депутат кўмак беришига у қадар ишонмаган эдим. Бу фикрим нотўғри эканини тушундим. Менга бир неча жойдан бўш иш ўрни таклиф қилди. Гўзаллик салонида ишлаш ёқди. Энди севимли касбим, иш жойим бор.
Маълумотлар Т. Алибоева аҳоли бандлигини таъминлашга алоҳида эътибор қаратаётганини кўрсатмоқда. 2023 йил давомида унинг ёрдамида 14 нафар фуқаро ишга жойлаштирилган.

Ўзбекистон “Адолат” СДП
Андижон вилоят кенгаши
Матбуот хизмати.